Ахмети се сретна со претседателот Бегај: Албанија и Македонија мора да одат рака под рака кон Европа

Претседателот на Демократската унија за интеграција, Али Ахмети, денес престојуваше во Тирана каде што, пред почетокот на националниот протест „Правда за ослободителите“, беше пречекан на топла и братска средба од претседателот на Република Албанија, Бајрам Бегај.

Во соопштението објавено по средбата, Ахмети нагласи дека разговорот со претседателот Бегај се фокусирал на актуелните случувања во регионот, евроатлантските процеси и улогата што ја играат Албанија и Северна Македонија во одржувањето на мирот, стабилноста и меѓусоседската соработка.

„Му честитав на претседателот Бегај за напредокот на Албанија на патот кон европска интеграција, нагласувајќи дека е од витално значење Северна Македонија да оди рамо до рамо со Албанија во овој процес“, изјави Ахмети, додавајќи дека „патот до Брисел е национално стратешко патување кое ги зајакнува мирот, развојот и регионалната соработка“.

Според него, двете земји треба да одат рамо до рамо кон заедничка европска иднина, како дел од споделената визија за регионална стабилност и просперитет. На средбата, како што известува Ахмети, се нагласи и важноста од зајакнување на стабилноста во регионот, забрзување на интеграцијата во Европската Унија и отстранување на границите што ги делат браќата од иста крв.

„Во обединета Европа, овие граници мора да се трансформираат во мостови што ги обединуваат народите“, нагласи лидерот на ДУИ.