Бесими: Со ребаланс на буџетот се гарантира исплатата на платите

Министерот за финансии Фатмир Бесими најави дека со ребалансот на буџетот се гарантира исплатата на платите кои во некои сектори се зголемени.

„Предлог-одлуката за распределба на средствата меѓу буџетските корисници е одлука за пренамена на средствата за исплата на зголемени плати за вработените во јавниот сектор, од овој месец, нешто што е договорено со синдикатите, исплата на зголемените пензии од 6 % за пензионерите од октомври, што е во согласност со методологијата што заедно ја дефиниравме, средства за социјални права, повеќе средства за земјоделски субвенции, за лекот трикафта за 55 пациенти и за ленти за лица со дијабетес“, рече министерот на финансии, Фатмир Бесими во Собранието каде се расправаше за дополнетата Предлог-одлука за прераспределба на средствата меѓу буџетските корисници, која содржи и осум амандмани кои беа прифатени на комисиската седница.

„Вредноста на оваа прераспределба е околу триста милиони евра, што е направено без зголемување на дефицитот и обезбедени се средства за сите трошоци што беа предвидени“, рече министерот Бесими.

Тој додаде дека тоа е направено од деловите каде што имало помала динамика на реализација, од заштеди и зголемени приходи од придонеси.