ВИДЕО | “ЛОВ НА ВЕШТЕРКИ“ – Конфликтот меѓу Украина и Русија се прелеа на друг континент: Украинците во Судан започнаа специјална операција !?

На 6. ноември весникот Kyiv Post објави две видеа за кои се верува дека прикажуваат украински специјални сили како ловат платеници од групата на Вагнер во Судан. Украинската Влада официјално не го призна ниту распоредувањето борбени единици во Судан, ниту спроведувањето операции против членовите на Вагнер во таа земја.

Според изворот на Kyiv Post од безбедносниот и одбранбениот сектор на Украина, во оваа африканска земја во моментов е во тек операција за „иселување“ на групата Вагнер, нивните локални терористи и вработени специјалци во руските специјални служби.

Во изјава за весникот, изворот кажал дека на видеото најверојатно се гледа акцијата на специјалните единици на Одбранбената разузнавачка служба на Министерството за одбрана на Украина, а објавената видео-снимка можете да ја погледнете ОВДЕ.

Се вели дека изворот одбил да даде детали за операцијата од безбедносни причини.

Во првото црно-бело видео, кое се чини дека е снимено со инфрацрвен дрон ноќе, борците опкружуваат зграда, а на видеото се истакнати цели внатре. Во друга секвенца, напаѓачите користат рачен фрлач на гранати за да пука низ прозорецот на зградата. Потоа се гледаат неколку експлозии, на видео снимено со обична камера.

Второто видео е направено во текот на денот, исто така од дрон. На него не се прикажани украински специјални сили, туку неколку мажи кои изгледаат како трчаат низ улиците на густо населен град или област.

Претходно, CNN објави, повикувајќи се на извор од украинската Армија, дека украинските разузнавачки служби можеби стојат зад серија напади со беспилотни летала и копнени операции против бунтовниците поддржани од Вагнер во близина на суданската престолнина.

Украински воен извор го окарактеризира овој чин како дело на „не-суданска војска“:

„Шаблонот на беспилотни летала кои директно удираа во целта беше многу невообичаен во Судан и поширокиот африкански регион“, тврди неименуваниот извор.

На 24. септември, Кирило Буданов, прв човек на Одбранбена разузнавачка служба на Украина (ДИУ), ги коментираше извештаите на CNN за наводната вмешаност на украинските специјални служби во нападите со беспилотни летала во Судан, но ниту ги потврди ниту ги демантираше наводите. Но, Кирило Буданов нагласи дека единици на Вагнер учествувале и во организацијата на државниот удар во Судан.

„Тоа се наши непријатели и ќе дејствуваме во кој било дел од светот“, порача накратко Кирило Буданов.