Воената елита се собра во Минхен, ќе пристигнат 50-тина претседатели на држави и влади: “Има само две клучни прашања“
Војните во Украина и Појасот Газа ќе бидат во центарот на дискусиите меѓу светската политичка и воена елита, која викендов се собира на традиционалната безбедносна конференција во Минхен.
На годишната конференција, позната како „Давос за одбрана“, учествуваат педесетина претседатели на држави и влади, бројни министри за надворешни работи и за одбрана, безбедносни експерти и лидери на меѓународни организации.
Центарот на Минхен, кој во следните три дена ќе биде престолнина на меѓународната дипломатија, е под силно полициско обезбедување.
Митингот се одржува неколку дена пред втората годишнина од руската инвазија на Украина и четири месеци од почетокот на војната меѓу Израел и Хамас што се прошири низ Блискиот Исток, вклучувајќи го и конфликтот на Запад со Хутите во Јемен.
Русија и Иран, кои ги поддржуваат Хутите и антиизраелскиот Хезболах во Либан, не беа поканети бидејќи, според организаторите, не покажале дека навистина се грижат за преговорите. Неформалното правило на конференцијата, која се одржува по 60-ти пат, е – „вклучете се и разговарајте меѓу себе, не предавајте и не се игнорирајте“.
Во главниот град на Баварија пристигнуваат потпретседателката на САД, Камала Харис, претседателите на Украина и Израел, Володимир Зеленски и Исак Херцог и високи кинески претставници.
Камала Харис се соочува со тешка задача да ги убеди сојузниците дека Соединетите Американски Држави се уште се подготвени да ја заштитат нивната безбедност, откако Доналд Трамп, фаворитот за републиканска номинација на претседателските избори, неодамна изјави дека нема да ги заштити членките на НАТО кои не трошат пари доволно во одбраната.
Конференцијата се одржува во време кога конфликтот меѓу Русија и Запад донесе војна во Европа, која со децении се бори да обезбеди мир, поддржана од американските безбедносни гаранции за НАТО, кој Доналд Трамп се закани дека ќе го укине.
Од првата конференција во 1963 година, Минхен служи како еден вид „пазар на идеи“ каде што политичарите и експертите даваат иницијативи и развиваат решенија за најкритичните безбедносни прашања на сегашноста и иднината.
Започнат за време на Студената војна, состанокот им дава простор за официјални и неофицијални дипломатски идеи, а хотелот „Bayerischer Hof“ каде што се одржува обезбедува засолниште за неформални состаноци на често заколнати непријатели, со што се реализира своето мото „градење мир преку дијалог“.
