Во недела започнува летното сметање на времето: Како поместувањето на стрелките влијае на нашето тело
Летното сметање на времето започнува во недела на 31 март во два часот по полноќ, кога стрелките ќе треба да се поместат напред. На овој начин ќе изгубиме еден час сон, а промената сепак влијае на нашето тело
Некои часовници, како оние на вашите уреди, ќе се постават автоматски. Но, за постарите уреди кои не се поврзани на интернет, треба да ги преместите рачно пред да легнете во сабота навечер.
Будењето еден час порано од вообичаеното може да го наруши нашиот деноноќен ритам или природниот 24-часовен часовник на телото и да направи да се чувствуваме поспани и дезориентирани, што пак може да резултира со други здравствени последици.
Можеби нема да спиете добро
Ноќта од сабота кон недела треба да си легнуваме еден час порано, за да ја намалиме можноста за лош сон. Во една студија објавена во списанието Sleep Science and Practice, речиси 14 отсто од луѓето рекле дека спиеле полошо во текот на две недели по летното сметање на времето во март 2021 година.
Како резултат на тоа, може да бидете помалку внимателни, побавни да реагирате и генерално да се чувствувате поспани. Сите ние се потпираме на дневната и ноќта за да му сигнализираат на нашите тела кога е време за будење и спиење, така што дури и суптилните промени може да го нарушат деноноќниот ритам што управува со нашиот одмор.
Возењето станува поопасно
Студијата од јануари 2020 година во Current Biology покажа дека сообраќајните несреќи со фатални последици се зголемиле за шест проценти во текот на неделата на летното сметање на времето, а заморот најмногу се наведува како причина за несреќите.
„Нашата студија дава дополнителен, ригорозен доказ дека менувањето на летното сметање на времето во пролетта доведува до негативни влијанија врз здравјето и безбедноста. Овие ефекти врз жртвите во сообраќајот се реални, а овие смртни случаи може да се спречат“, рече авторката на студијата Селин Ветер.
Повредите на работа се почести
Студијата од 2009 година објавена во Журналот за применета психологија покажа дека губењето на само еден час може да биде опасно ако работите на физички напорна работа. Способноста за контрола и донесување одлуки се намалува, бидејќи недостатокот на сон влијае на префронталниот кортекс на мозокот.
Авторот на студијата, Барнс, истражувал половина милион повреди меѓу рударите во период од пет години и дошол до заклучок дека во понеделник, ден по летното сметање на времето, повредите при работа се зголемуваат за повеќе од пет проценти и се потешки од во други денови.
