„Времето на омраза меѓу Србите и Албанците помина“ Вучиќ испрати порака за мир во Бујановац: Србија секогаш ќе биде подготвена да инвестира во албанските заедници

Српскиот претседател Александар Вучиќ изјави денеска дека Србија секогаш ќе биде подготвена да инвестира во албанските заедници и дека луѓето мора да разберат дека времето на омраза одамна поминало и дека сите мора да работаат и да соработуваат.

При посетата на основното училиште „Бранко Радичевиќ“ во Бујановац, на прашањето на албански новинар зошто не присуствувал ниту еден од претставниците на локалната самоуправа, која претежно ја сочинуваат Албанци, Вучиќ одговори дека сите биле поканети, но дека веројатно не дошле затоа што тоа немало да биде популарно во Приштина.

– Сигурен сум дека ќе донесеме инвеститори во Бујановац и во тие фабрики ќе работат Срби, Албанци и Роми кои живеат таму. Зборуваме за животите на луѓето, населението е измешано, правиме патишта за сите – рече Вучиќ.

Тој додаде дека има проблем со тоа што во таа општина соодносот на населението секогаш бил 60-40, а кога треба да се распределат средства, односот е 85-15 за Албанците.

– Србија секогаш ќе биде подготвена да инвестира во албанските заедници, но тој вид диспаритет треба да се промени. Луѓето мора да сфатат дека времето на омраза одамна помина и дека сите мора да работиме и да соработуваме – истакна Вучиќ.

На прашањето на истиот новинар што се случило со планот од седум точки што го претставија Албанците за нивно вклучување во државните институции, Вучиќ одговори дека некои работи од тој план се веќе направени.

– Ова пред сè се гледа во присуство на поголем број лекари Албанци и малку поголемо присуство на Албанци во полицијата. Мислам дека секако не е само виновна државата. Некои разбираат дека тоа не е политика, туку прашање на животот на обичните Албанци и тогаш мојата врата е секогаш отворена за нив – рече Вучиќ.