Вучиќ: Во јуни следуваат големи промени поради Украина, Американците создаваат блок во Европа
– Претседателот на Србија Александар Вучиќ денеска изјави дека она што се случува во глобалната политика, а пред се во Европа, ќе ја промени динамиката на односот на Србија со ЕУ и дека се одвива паралелен процес под влијание на САД, во кој се создава посебен блок во Европа, кој може да стане најсилен, јави дописиникот на МИА од Белград.
-Тоа треба да се случи веќе во јуни, бидејќи Украина нема лесно да победи во воена смисла и очекувам да добие голема динамика на европскиот пат. Следува итно запонување на европски преговори со можност за брз влез во ЕУ затоа што Американците прават посебен блок во Европа кој не е мал. Полска, балтичките земји плус Украина, тие пет земји. Ќе имате земји кои се поголеми од Франција и се приближуваат кон Германија. Тогаш е јасно дека тој квинтет или секстет со Романија станува најсилен во Европа после Германија. Ние сакаме да се позиционираме како централноевропска земја, затоа имаме поблиски односи со Унгарија. Тоа ќе ја промени динамиката на нашиот однос со Европа. Сакам да верувам дека тоа ќе биде во позитивна смисла, но за нас има ограничувачки фактори во однос на санкциите против Русија и Косово, рече Вучиќ на ТВ Пинк.
Како што рече, Америка ќе биде доминантна, ќе следи договор со Европа, но со барање во иднина да спроведат мерки кон Кина, какви што спроведуваат САД.
– Интересно е што се случи на седницата на Советот на Европа, важна промена кон Кина, до сега таа беше наш економски партнер, наш конкурент и стратешки ривал. За првпат Урсула фон дер Лајен рече – стратешки ривал. Америка ќе биде доминантна во Европа. Кина ја гледа како стратешки противник. Затоа ќе биде интересна посетата на Фон дер Лајен и Макрон на Кина, рече Вучиќ.
Вучиќ се осврна на односите со Унгарија, потсетувајќи на изјавата на Виктор Орбан дека, историски гледано, тие се на највисоко ниво. Како што рече, со Орбан има старатешки дијалог и очекува средба меѓу двете влади во мај, која ќе доведе до формирање на ново тело, односно стратешки совет.
На прашањето што мисли за потерницата издадена од Меѓународниот кривичен суд (МКС) против рускиот претседател Владимир Путин, Вучиќ одговори дека ја смета за политички многу лоша одлука која ќе чини многу во животот на Русите и Украинците, но и со големо влијание врз економијата на цела Европа.
-Ќе треба да седнете со Путин за да разговарате, а како можете да разговарате со него и да му го оставите ова? Како воопшто мислите да направите некаков договор, а ова да остане како Дамаклов меч над главата. Зошто го ограничивте?,праша Вучиќ.
Тој посочи дека МКС презел обврска која не знае како ќе ја спроведе.
