Газа: Во израелските напади досега загинаа 447 деца

– Властите во Газа денеска објавија ажурирани податоци за убиените во израелските воздушни напади, јавува Скај Њуз.

Според локалното Министерство за здравство во изминативе денови загинале 1.417 луѓе, меѓу кои и 447 деца и 248 жени.

Во соопштението се наведува и дека од саботата, кога почнаа изрелските воздушни напади на Газа ранети се 6.268 лица.

„Здравствениот систем почна да колабира“, се вели во денешното соопштение на министерството. „Бројот на повредени лица е поголем од клиничките можности на болниците, дури и откако тие беа проширени и повредените се сместени во ходниците“, велат од Министерството.

Израелската воздушна кампања против Газа почна по ненадејниот и силен напад на Хамас врз Израел, при што убиени се повеќе од 1.300 Израелци.