ГЕВГЕЛИЧАНЕЦОТ ВАСКО КИРОВ ВИЦЕШАМПИОН НА ЕВРОПА ВО КЛАСАТА МХ1 НА „АЛПЕ АДРИА МОТОКРОС ШАМПИОНАТОТ 2025“

Гевгеличанецот Васко Киров, кој вози за Мото Клубот Вардар од Скопје, се искачи на високата вицешампионска позиција, освојувајќи го второто место во еден од најпрестижните мото шампионати “ Алпе Адриа Мотокрос Шампионат 2025 ”.

Киров се натпреваруваше на три трки од шампионатот и тоа во Крешево, Република Босна и Херцеговина, Чачак, Република Србија и Козаревац, Република Хрватска. Освои вкупно 94 бодови кои беа доволни за да го освои 2-рото место на шампионатот. Ова е огромен успех за Република Македонија, за Мото Клубот Вардар како и за македонскиот мотокрос спорт. Тој е единствен натпреварувач од нашата држава кој освои позиција помеѓу првите тројца најдобри возачи во престижната MX1 класа.

Васко Киров има 34 години, роден е и живее во Гевгелија. Своите почетоци во мотокрос трките ги има започнато во 2014. година. Во изминатиот период учествувал и освојувал голем број награди и високи пласмани на државните шампионати во класата MX1.

Мотокрос унијата „Алпе Адрија“ е основана во 1981 година. Прво е основана комисијата за мотокрос, но наскоро се организирани и други дисциплини од мото спортот. Трките по друмски патеки се најуспешната дисциплина во ААМУ со просек од повеќе од 500 возачи по сезона и историја од 20 години .