Германија донесе нов закон за државјанство, имигрантите можат да имаат двојно или повеќекратно државјанство
Германскиот парламент во петокот усвои нов закон за државјанство за зголемување на социјалното и политичкото учество на имигрантите.
Околу 382 пратеници – главно од лево-либералната коалициска влада на канцеларот Олаф Шолц – гласаа за законот, додека 234 конзервативни и десничарски пратеници гласаа против. Дваесет и тројца пратеници беа воздржани.
Со новиот закон, имигрантите ќе имаат право на германско државјанство по пет години престој во земјата, наместо досегашните осум години.
За имигрантите кои покажале извонредни академски или професионални достигнувања и имаат добри јазични вештини, овој период ќе се намали на три години.
Новиот закон за државјанство ќе им овозможи на имигрантите да имаат двојно или повеќекратно државјанство, што досега не беше можно за многу од оние кои доаѓаат надвор од Европската унија.
Германската министерка за внатрешни работи Ненси Фезер го поздрави гласањето, велејќи дека тоа е важен реформски чекор како дел од напорите на владата за модернизација на законите за имиграција.
„Креираме модерно законодавство за имиграција што ќе ги задоволи барањата на нашето различно општество. Време беше ова да се направи“, рече социјалдемократскиот политичар.
Таа, исто така, ги критикуваше екстремно десничарските политичари за искривување на јавната дебата за миграцијата со спроведување на расистичка пропаганда против имигрантите долги години.
„Овие дебати се водат на грбот на луѓето кои долги години живееле и работеле во Германија, но никогаш не им било дозволено целосно да бидат тука. Нашата реформа им покажува: Вие припаѓате на Германија!“, рече Фезер.
Таа, исто така, подвлече дека реформата на законот за државјанство ќе и помогне на Германија да се справи со недостигот на квалификувани работници со привлекување квалификувани специјалисти и професионалци од странство.
„Ние сме среде глобален натпревар за најдобар мозок. Итно ни требаат квалификувани работници во многу области од нашата економија. Ќе ги привлечеме најдобрите умови само ако можат да станат целосен дел од нашето општество во догледна иднина, со сите нивни демократски права“, рече Фезер.
Во моментов, околу 12 милиони луѓе во Германија – околу 14% од вкупното население – немаат германско државјанство. Околу 5,3 милиони од нив живеат во земјата најмалку 10 години, според официјалните податоци.
Многумина од нив се двоумеле да аплицираат за германско државјанство во минатото поради досадните бирократски процедури, строгите прописи и ограничувањата за поседување двојно државјанство.
