Готово е! Лука Модриќ го напушта Реал Мадрид, во сабота се збогува со „Бернабеу“

Лука Модриќ ќе го одигра својот последен натпревар за Реал Мадрид на стадионот „Сантијаго Бернабеу“ следниот викенд, потврди хрватскиот играч од средниот ред во објава на социјалните мрежи, а веста веќе ја објавуваат како ударна вест сите светски медиуми.

Тоа ќе биде натпревар против Реал Сосиедад, а Модриќ потврди дека сепак ќе игра за Реал на Светското клупско првенство во јуни, а потоа ќе го напушти клубот.

Модриќ има 39 години и долго време се зборува за негово заминување од стадионот „Сантијаго Бернабеу“, уште од минатата година кога се случи пресврт и Хрватот на крајот ја продолжи соработката со клубот.

Сега е време да се збогуваме и да завршиме една тринаесетгодишна приказна, бидејќи Модриќ пристигна во Реал во 2012 година и оттогаш прерасна во еден од најдобрите играчи од средниот ред во светот.

Со Реал, Модриќ освои шест титули во Лигата на шампионите и четири трофеи во шпанското првенство, а во 2018 година беше прогласен за најдобар фудбалер во светот откако ја доби Златната топка.

„Драги навивачи, дојде времето. Момент што никогаш не сакав да дојде, но тоа е фудбалот и сè во животот има почеток и крај. Во сабота го играм мојот последен натпревар на стадионот „Бернабеу“, напиша Модриќ во писмото што го објави по повод неговото заминување од Реал.

Дуелот Реал Мадрид-Реал Сосиедад ќе се игра во сабота во 16:15 часот, а тогаш Модриќ ќе се збогува со навивачите на Реал Мадрид.

Досега, Модриќ одигра 590 натпревари за Реал, постигна 43 гола и запиша 95 асистенции. Претходно играше за Тотенхем и Динамо Загреб.