ДОДИК: Ќе ги потпишам законите што ги поништи Шмит, тој глуми лудило низ Сараево

Претседателот на Република Српска Милорад Додик во Бања Лука изјави дека веднаш по завршувањето на потребните процедури ќе ги потпише поништените закони за неспроведување на одлуките на Уставниот суд на Босна и Херцеговина и на високиот претставник на територијата на тој субјект.

Тие два закони, кои беа усвоени од Собранието на Република Српска на 21 и 27 јуни, високиот претставник Кристијан Шмит ги поништи на 1 јули, со оценка дека се напад на уставниот поредок на Босна и Херцеговина, а со тоа и на Дејтонскиот мировен договор.

Додик денеска изјави дека ситуацијата е олеснета со тоа што Бошњачкиот клуб во Советот на народите на Република Српска ја повлече претходната одлука за ставање вето на тие два закони. Бошњачкиот клуб го повлече ветото бидејќи Шмит ги укина двата спорни закони и ги суспендираше сите понатамошни процедури поврзани со нив.

Во врска со одлуката на ЕУ да одобри 303 милиони евра грантови за четири нови инфраструктурни проекти во Федерацијата Босна и Херцеговина, а ниту еден од Република Српска, Додик пред новинарите во Бања Лука изјави дека Унијата со ова ја „дели БиХ“.

„Моето прашање е како мислат, без заеднички одлуки во Сараево, да го спроведат она што го решија вчера (да одобрат 303 милиони евра за инфраструктурни проекти во Федерацијата Босна и Херцеговина)“, рече Додик.

Тој изјави дека ЕУ ги суспендирала средствата за дел од коридорот Пет-це (Вц) во Република Српска, од Добој до Модрича и додаде дека „ваков понижувачки однос“ нема да биде прифатен во тој ентитет.

„На овој начин, бриселската администрација ги затвора сите можни активности за да го реализираат она што го сакаат“, рече Додик.

Тој изјави дека ваквата постапка на ЕУ нема да ги промени ставовите на Република Српска, бидејќи нејзиниот народ „не е подготвен да ја продаде својата слобода и карактер за одредена сума пари“, кои би им биле дадени во вид на донации. .

Додик, исто така, рече дека Република Српска „не сака никаков конфликт“ и повтори дека Шмит не е законски избран висок претставник, туку „добро платена личност која глуми лудило околу Сараево“.

Тој изјави и дека ЕУ бара од Република Српска да го прифати Кристијан Шмит за висок претставник и неговото наметнување закони и додаде дека тој нема да го стори тоа.