Драма во пресрет на свадбата на милијардерот Џеф Безос: Властите во Венеција најавија дека повеќе нема да го толерираат ова (фото)

Градските власти во Венеција во саботата ги осудија пишувањата на светските медиуми за претстојната венчавка на американскиот милијардер Џеф Безос во тој италијански град, појаснувајќи дека прославата ќе биде од разумни размери, а на неа ќе присуствуваат само 200 гости.

Основачот на Amazon и неговата свршеница, новинарката Лорен Санчез, ќе се венчаат во Венеција на крајот на јуни. 

Напоменуваат дека свадбата нема да ги вознемири жителите

Еден италијански весник неодамна објави дека свадбата на Безос ќе трае три дена и дека на прославите ќе присуствуваат по 250 гости секој ден, меѓу кои и Доналд Трамп. Се шпекулира и дека богаташот веќе резервирал пет хотели, како и импресивен број водени такси и лежај за својата мегајахта.

Но, во саботата беше објавено соопштение во кое се осудуваат „лажните вести“ и се демантираат информациите дека Безос планира да приватизира цели делови од градот.

Многубројните шпекулации и лажни вести кои се шират во последно време за свадбата на Џеф Безос се целосно неосновани“, уверуваат од општината. Беа поканети само 200 гости. Затоа, на Венеција ќе и’ биде лесно да биде домаќин на ваков настан, без тоа да биде непријатност за градот, неговите жители и другите посетители.

Од општината посочија дека во Венеција редовно се одржуваат многу поважни меѓународни настани од ова, од политички самити до познатата Мостра.

Градоначалникот Луиџи Бруњаро ја поздрави одлуката на парот да се венчаат во неговиот град, велејќи за венецијанското издание на италијанскиот весник „Кориере дела сера“ дека економските придобивки од венчавката може да се избројат во милиони долари.