,,Европа може да се сруши!” Ангела Меркел загрижена за кризата во Европа, но и десницата во Германија

Поранешната германска канцеларка Ангела Меркел (70) проговори за актуелната криза и политичките предизвици.

Меркел повика на европско единство пред големите политички предизвици, велејќи за весникот Rheinische Post дека „важно е да се држиме заедно за да се избегне уништување на Европа“.

Меркел, членка на Христијанско-демократската унија (ЦДУ), додаде дека миграцијата останува европска задача, која може да се реши само во соработка со соседните земји.

Поранешната канцеларка се осврна и на резултатите од германските сојузни избори одржани на 23 февруари, изразувајќи задоволство од победата на нејзината партија.

Сепак, таа изрази загриженост за силата на екстремно десничарската Алтернатива за Германија (AfD), велејќи: „Се разбира, би сакала Алтернативата за Германија да не биде толку силна како што е“.

Канцеларката, која беше на чело на владата во Берлин од 2005 до 2021 година, нагласи дека слабеењето на политичкиот центар „мора да ги загрижи сите, а тоа ме загрижува и мене“.

Таа се надева дека актуелните преговори меѓу блокот ЦДУ/ЦСУ и Социјалдемократската партија на Германија (СПД) ќе доведат до формирање на нова влада, бидејќи коалицијата на левиот центар во последните години предизвика големо незадоволство во јавноста.

Таа, исто така, изрази поддршка за планираното зголемување на трошоците за одбрана, за кое се залагаат ЦДУ/ЦСУ и СПД.

Ангела Меркел беше првата жена канцеларка во германската историја. Во декември 2021 година, таа беше наследена како канцелар од Олаф Шолц од СПД, кој беше поразен на неодамнешните предвремени парламентарни избори.