Залужни најави предавање на Авдијивка: Важно е да се спасат луѓе, а не територија!
Врховниот командант на вооружените сили на Украина, Валериј Залужни, потврди дека руската армија ја зазеде Маринка и изјави дека градот повеќе не постои.
Според Залужни, украинските сили се повлекле од западната периферија на градот и на некои места копале околу Маринка, а на други малку подалеку. Залужни ја коментираше и големата офанзива на руската армија врз Авдијивка, која ја спореди со Бахмут.
– За одреден локалитет не треба да има драма или жалост. Водењето на воените операции подлежи на сопствени закони кои не зависат од тоа дали тоа им се допаѓа на пратениците или новинарите. Непријателот има можност да ги концентрира силите во одредена насока и може да го направи тоа што се случи со Бахмут за два-три месеци – вели Залужни.
Залужни нагласи дека е важно штабот да штити војници, а не територии.
– Секое парче земја ни е драго и ќе го браниме точно онолку колку што имаме сили. Ако нема доволно сила, ќе ги спасиме луѓето, а потоа повторно ќе ја преземеме територијата – рече Залужни.
Врховниот командант на вооружените сили на Украина исто така рече дека погрешил кога мислел дека големите загуби ќе ја запрат руската инвазија.
– Една од моите најголеми грешки беше тоа што верував дека загубите што му ги нанесовме на непријателот можат да ги спречат. Таков број загуби би ја запреле секоја земја, но не и Руската Федерација. Таков е за жал односот на Руската Федерација кон сопствениот народ – рече Валериј Залужни и додаде дека сега му е тешко да предвиди кои загуби ќе ја принудат Руската Федерација да запре.
Залужни рече и дека воената стратегија за 2024 година ќе биде различна и дека планот е да се дејствува поефикасно и да се заштитат животите на војниците.
– Ги најдовме проблемите и најдовме можеби 90 проценти од решенијата за оние прашања што треба да се решат. Работиме на тоа и нашите партнери апсолутно се согласуваат со нас – рече врховниот командант.
Залужни е убеден дека вооружените сили на Украина нема да имаат проблеми со оружје бидејќи Западот ќе продолжи да го снабдува, а ќе се зголеми и нивното сопствено производство.
