КАКО Е ОВА МОЖНО !? Компанијата чија подморница усмрти пет луѓе нуди нови нуркања до потонатиот брод ‘Титаник’: “Ви нудиме возбудливо искуство…“
И покрај тоа што подморницата на компанијата OceanGate неодамна експлодираше при нуркање кон потонатиот брод Титаник, при што животот го загубија сите пет патници во подморницата, се чини дека организаторите на „патувањето“ не сакаат да се откажат од овие експедиции или барем тоа не го соопштуваат јавно.
Имено, на официјалната веб-страница на OceanGate сè уште може да се видат понуди за патувања до потонатиот брод Титаник, како и други „експедиции“.
И не само тоа – на страницата се нагласува дека овогодинешната експедиција е сè уште „во тек“, додека се нудат два датума за 2024 година, при што повторно би отишле до потонатиот брод Титаник.
„Ова ќе биде возбудливо и уникатно искуство“, се наведува на веб-страницата, заедно со претходно објавената цена од 250.000 долари по лице за оваа експедиција.
Да потсетиме, пред точно десет дена официјален претставник на американската крајбрежна стража потврди дека сите пет лица на исчезнатата подморница OceanGate „Titan“ загинале во „катастрофална имплозија“.
„Овие луѓе беа вистински истражувачи кои споделуваа посебен дух на авантура и длабока страст за истражување и заштита на светските океани“, се вели во соопштението на компанијата OceanGate.
„Нашите срца се со овие пет души и секој член на нивните семејства во ова трагично време“, објави тогаш компанијата.
Подводен робот без екипаж испратен од канадски брод го открил местото на подморницата на околу 488 метри од лакот на вековната урнатина, 4 километри под површината, соопшти задниот адмирал на американската крајбрежна стража Џон Маугер на прес-конференција.
Спасувачките тимови од неколку земји поминаа денови пребарувајќи илјадници квадратни километри на отворено море со авион и брод за каков било знак на „Titan“ долг 6,7 метри, со кој управуваше американската OceanGate.
Откривањето на подводни звуци со помош на сонарни пловци фрлени од канадски авиони привремено понуди надеж дека луѓето во подморницата се живи и се обидуваат да комуницираат со спасувачите. Но, официјалните лица предупредија дека анализата на звукот е неубедлива и дека звуците можеби воопшто не доаѓале од „Titan“.
Во подморницата имало капетан и четворица патници. Еден од патниците на исчезнатата подморница бил британскиот бизнисмен Хамиш Хардинг, чија авиокомпанија објави информации за неговата експедиција на социјалните мрежи.
Хамиш Хардинг, 58-годишен авијатичар и вселенски турист кој раководеше со Action Aviation, објави на својот профил на социјалната мрежа Инстаграм во неделата дека е горд што се приклучил на мисијата OceanGate.
Во подморницата биле и пакистанскиот бизнисмен Шахзада Давуд и неговиот син Сулејман.
Меѓу патниците биле и францускиот океанограф Пол-Хенри Наргеолет, експерт за потонатиот брод Титаник, и Стоктон Раш, основачот на OceanGate и сопруг на потомок на една од жртвите на Титаник.
Овој брод тежок 46.000 тони со 2.224 патници удри во санта мраз во април 1912 година на пат од Англија до Њујорк.
Во потонувањето на бродот, кој се сметаше за непотопливо чудо на индустриската ера, загинаа повеќе од 1.500 илјади луѓе, меѓу кои и бројни аристократи. Потонатиот брод беше откриен во 1985 година од американско-француска експедиција.
