Ковачевски – Фредриксен: Силна поддршка за социјалдемократските политики на претстојните избори, ЕУ е единствената алтернатива за Северна Македонија
Претседателот на Социјалдемократскиот сојуз на Македонија, Димитар Ковачевски, во рамки на работната посета на Рим, Италија оствари средба со премиерката на Данска Мете Фредриксен, која воедно е и претседателка на Социјалдемократската партија на Данска. На средбата, на која присуствуваа и Бојан Маричиќ, секретар за меѓународна соработка и прв заменик на претседателот на Владата на Република Северна Македонија како и Бисера Костадиновска – Стојчевска, потпретседателка на СДСМ и министерка за култура се дискутираше за повеќе актуелни прашања важни за Северна Македонија, регионот и Европа.
Ковачевски и Фредриксен ја потенцираа важноста на претстојниот период имајќи ги предвид изборните процеси кои се очекуваат годинава и во Северна Македонија и во Европската Унија, посочувајќи ја воедно и потребата и важноста на продолжувањето на социјалдемократските политики кои придонесуваат во економскиот и социјален развој на континентот.
Ковачевски на средбата истакна дека Европската Унија е единствената алтернатива за Северна Македонија, бидејќи тоа значи поголем економски раст, подобри услови за инвестирање со што ќе се обезбедат подобри и подобро платени работни места, повисоки плати, и подобар животен стандард на граѓаните, социјална правда, развој на демократијата и функционално владеење на правото. Ковачевски потенцираше дека мнозинската волја на граѓаните на Северна Македонија е членство во Европската Унија и дека СДСМ како државотворна и прогресивна партија изминатите 7 години спроведува проевропски политики кои меѓу друготго обезбедија членство во НАТО и почеток на преговори со Европската Унија по 17 години чекање. Ковачевски на средбата потенцираше дека за претстојните избори СДСМ подготвува прогресивна програма согласно европските политики, која ќе обезбеди и продолжување на досегашните прогресивните политики но и ќе ги обезбеди европските вредности дома.
На средбата, Фредриксен потенцираше дека е исклучително важно Северна Македонија да остане и понатаму посветена на реформските процеси кои ќе обезбедат подобрени демократски показатели во сите полиња, а кои воедно ќе обезбедат што побрзо приближување на земјата до европските стандарди. Фредриксен, како претседателка на Социјалдемократската партија на Данска, која е сестринска партија на Социјаледмократскиот сојуз на Македонија, ја изрази својата поддршка за СДСМ на претстојните избори потенцирајќи дека социјалдемократски политики се оние кои прават суштинска разлика и придонесуваат кон подобрување на животот на граѓаните.
Воедно, претседателот Ковачевски на средбата со данската премиерка посочи дека Северна Македонија од првиот ден од почетокот на неоправданата и неиспровоцирана руска воена агресија врз Украина, дава целосна и недвосмислена поддршка за Украина и украинскиот народ и дека во неговиот прв мандат како премиер земјата целосно се усогласи со заедничката надворешна и безбедносна политика на ЕУ.
Центар за комуникации со јавноста на СДСМ
