Кои земји се приклучија на БРИКС на првиот ден од новата година?

Саудиска Арабија официјално се приклучи на блокот БРИКС , објави денеска саудиската државна телевизија.

Министерот за надворешни работи на Саудиска Арабија, принцот Фајсал бин Фархан, во август изјави дека кралството ќе ги проучи деталите пред предложениот датум за пристапување на 1 јануари и ќе донесе „соодветна одлука“, објави Ројтерс.

Тој посочи дека групата БРИКС е „корисен и важен канал“ за зајакнување на економската соработка. Блокот БРИКС претходно го сочинуваа Бразил, Русија, Индија, Кина и Јужноафриканската Република, но од 1 јануари тој беше двојно зголемен од новите членки – Саудиска Арабија, Обединетите Арапски Емирати, Египет, Иран и Етиопија.

Влегувањето на Саудиска Арабија во БРИКС доаѓа во услови на геополитички тензии меѓу САД и Кина и проширување на кинеското влијание врз кралството, соопшти агенцијата.

И покрај силните врски со САД, Саудиска Арабија сè повеќе оди по својот пат поради загриженоста дека Вашингтон е помалку посветен на безбедноста на Персискиот Залив отколку во минатото.

Кина, најголемиот купувач на нафта од Саудиска Арабија, ги предводеше повиците БРИКС да се прошири и да стане противтежа на Западот.

Да потсетиме дека Аргентина го одби членството.