Лажица маслиново масло дневно го намалува ризикот од смрт од деменција за 28%

Една лажица маслиново масло на ден може да помогне во борбата против деменција, сугерира новото истражување. Следејќи речиси 100.000 луѓе во текот на 28 години, истражувачите открија дека дневната потрошувачка на повеќе од седум грама маслиново масло е поврзана со 28% помал ризик од смрт поврзана со деменција, без оглед на тоа што друго јаделе луѓето, пишува IFL Science.

Маслиновото масло е суштинска состојка на медитеранската исхрана, која долго време се сметаше како корисна за многу аспекти на здравјето. Се појавува и во други начини на живот – атлантската диета, особено затоа што фокусот во светот на исхраната повеќе не е на ниската содржина на масти како што беше во поголемиот дел од 20 век.

Меѓутоа, освен што е добро за нашето тело, дали маслиновото масло може да биде добро и за нашиот мозок?

Студијата опфатила 92.383 луѓе, со просечна возраст од 56,4 години. Сите учесници беа медицински професионалци од Соединетите Американски Држави, како дел од две големи студии, започнати во 1976 и 1986 година. На учесниците периодично им беа давани прашалници, но собирањето информации за потрошувачката на маслиново масло започна дури во 1990-тите.

Конечната база на податоци опфати 60.582 жени и 31.801 маж, откако беа исклучени оние со нецелосни информации и оние со историја на кардиоваскуларни болести или рак. Во текот на 28 години следење, имаше 4.751 смртни случаи поврзани со деменција.

Ризикот од смрт од деменција бил за 28% помал кај оние кои консумирале повеќе од седум грама маслиново масло дневно – околу половина лажица – во споредба со луѓето кои ретко или никогаш не консумирале маслиново масло. Изненадувачки, тоа што го јаделе остатокот од времето изгледало дека немало голема разлика.

Студијата открива дека може да има одредена корист од замена на мала количина маргарин или мајонез секој ден со маслиново масло. Наодите ги прошируваат тековните препораки за исхрана за маслиново масло и други растителни масла во контекст на когнитивното здравје и поврзаната смртност.

Бидејќи се работи за набљудувачка студија, таа не покажува директна причинско-последична врска, така што резултатите мора да се толкуваат со претпазливост. Не можеме со сигурност да кажеме дека конзумирањето на одредена количина маслиново масло директно го намалува ризикот од смрт од деменција, но можеме да кажеме дека изгледа дека двете работи се поврзани.

Урамнотежената исхрана ќе вклучува комбинација на масла за различни намени, но маслиновото масло е добро за многу намени. Како извор на незаситени масти, се препорачува за добро здравје на срцето, а сега оваа голема студија сугерира дека може да биде корисна и за мозокот.

Веројатно не е штетно да јадете малку повеќе маслиново масло – ако можете да го добиете во денешната економија.