Макрон повика на нови избори во северниот дел на Косово
„Побаравме од двете страни наскоро да организираат нови избори во овие четири општини, обезбедувајќи значајно учество од српска страна“
Францускиот претседател Емануел Макрон повика на нови избори во четири општини на северот на Косово по средбата со германскиот канцелар Олаф Шолц.
Макрон на прес-конференцијата по вториот Самит на Европската политичка заедница во Молдавија рече дека тој и Шолц се согласиле за неопходноста од нови избори во регионите со доминантно српско население.
„Побаравме од двете страни наскоро да организираат нови избори во овие четири општини, обезбедувајќи значајно учество од српска страна“, рече Макрон.
Тој додаде дека за време на неговите состаноци со Шолц и локалните политичари се согласиле дека во наредните недели ќе биде донесена дефинитивна одлука за ситуацијата во Косово.
Тензиите и понатаму се големи во Косово по минатомесечните локални избори во неговиот северен регион, кои беа бојкотирани од етничкото српско малцинство. Новоизбраните албански градоначалници се сместија во нивните канцеларии со помош на косовската полиција во петокот.
Самитот на Европската политичка заедница се одржа во Булбоака во близина на Кишињев, Молдавија, на кој се состанаа лидерите на 27-те земји членки на Европската Унија и лидерите на 20 други европски земји.
Европската политичка заедница беше создадена во мај минатата година како последица на руската инвазија на Украина за да одговори на критичните предизвици со кои се соочува Европа, вклучително енергетската безбедност и стабилноста.
