Мајка убила две бебиња и со години ги чувала нивните тела во замрзнувач! Ниту таткото на децата не знаел што направила

Новороденчињата имале само еден ден кога починале

Полицијата во Јужна Кореја соопшти дека побарала налог за апсење на жена обвинета дека убила две нејзини новородени бебиња и ги чувала нивните тела во замрзнувач со години.

Службеникот на провинциската полиција Ѓеонги Намбу изјави за Си-Ен-Ен дека жената, во нејзините 30-ти, признала дека ги убила бебињата и рече дека тоа го сторила затоа што се соочила со економски тешкотии додека се грижела за своите три други деца, на возраст од 12, 10 и 8 години.

Новороденчињата имале само еден ден кога починале, додаде службеникот.

Нејзината прва наводна жртва е нејзиното четврто дете, родено во болница во ноември 2018 година. Полицијата вели дека таа го задавила девојчето еден ден по породувањето и го ставила телото во замрзнувачот во нејзиниот дом. Таа е обвинета дека истото му го направила на своето петто дете, момче родено во ноември 2019 година.

Нејзиниот сопруг изјавил дека му било кажано дека двете деца биле абортирани, па затоа не знаел за убиствата, велат од полицијата.

Случајот излезе на виделина во мај кога владиниот одбор за ревизија и инспекција утврди дека раѓањата на бебињата никогаш не биле официјално регистрирани, иако за тоа имало записи во болницата.

Одборот потоа ја известил градската управа на Сувон, општинската влада, која побарала полициска истрага откако мајката одбила увид на лице место.

На 21 јуни полицијата извршила претрес и одземање во куќата на жената при што таа ги признала убиствата, велат од полицијата.