Министерот Муцунски учествува на министерскиот состанок на НАТО во Брисел
Министерот за надворешни работи и надворешна трговија Тимчо Муцунски вчера и денеска учествуваше на министерскиот состанок на земјите членки на НАТО што се одржува во седиштето на Алијансата во Брисел, каде што одржа говор, информираат од МНР.
На средбата беше истакната важноста на Западен Балкан како регион од стратешко значење за НАТО и Европската Унија, со акцент на потребата од побрза реакција во регионот на Унијата како суштински елемент за регионалната и европската стабилност.
Министрите ја потврдија важноста на стратешкото партнерство меѓу двете организации и нивната комплементарност во напорите за обезбедување постојан мир и стабилност во евроатлантскиот регион.
„Од страна на министрите беше истакнато дека посилен европски столб во рамките на силна НАТО Алијанса ќе придонесе за натамошно зајакнување на трансатлантската стабилност. Во таа насока беа поздравени новите иницијативи на ЕУ за зајакнување на одбранбените капацитети, а беше нагласена потребата од вклучување на сојузниците од НАТО кои не се членки на ЕУ“, се вели во соопштението на МНР.
Дополнително, изразена е силна поддршка за напорите на САД за постигнување постојан мир преку патниот и дипломатскиот дијалог. Потврдени се и заложбите за зголемување на буџетските распределби за одбраната, како и зајакнување на капацитетите и вештините за градење безбедност и колективна одбрана, со цел поефикасен одговор на заедничките закани и предизвици.
На маргините на средбата, министерот Муцунски оствари кратки билатерални средби со генералниот секретар на НАТО Марк Руте, како и со колеги министри од Обединетото Кралство, Холандија, Романија, Германија, Италија и Црна Гора. Тие разговараа за прашања поврзани со регионалната стабилност, безбедност и мир.
