Мицкоски: Државата за нечии хирови ќе треба да врати 50 милиони евра

Премиерот Христијан Мицкоски денеска пред медиумите соопшти дека одлуката на Уставниот суд за поништување на данокот на солидарност е конечна и мора да се почитува, а сите засегнати субјекти имаат легитимно право да бараат обесштетување во вид на задоцнета камата.

Тој во одговор на новинарско прашање рече дека нема намера да ја коментира одлуката на Судот и дека во рамките на Владата заедно со Министерството за финансии ќе направат нацрт на соодветните компании, ќе разговараат и ќе најдат решение.

„Како и за сè друго, ќе најдеме решение и за ова. Сигурен сум дека на крајот на денот заедно ќе го надминеме овој проблем, но и стотиците други низ кои поминавме во последните месеци“, рече тој, нагласувајќи дека се разгледува и можноста да се бара одговорност за настанатата ситуација.

Уставниот суд вчера донесе одлука за поништување на Законот за данок на солидарност, со што државата може да им врати средства на 156 фирми во износ од приближно 50 милиони евра.

Данокот на солидарност беше воведен во 2023 година како еднократен, вонреден јавен данок. Данокот ги опфаќа компаниите кои во 2022 година оствариле вкупни приходи од над 615 милиони денари, со цел да се соберат средства за ублажување на последиците од кризата и солидарно придонес кон јавната потрошувачка.

Мицкоски рече дека и кога е донесена одлука за воведување на таков данок на солидарност, тој предупреди дека ќе дојде време за плаќање, односно ќе треба да се вратат собраните средства.

„И тогаш на средби со претставници на меѓународни финансиски институции јас лично кажав дека еден ден некој ќе мора да го сврти тој бес. И сега наместо 50 милиони за нешто друго, ќе треба да ги вратиме каприците на нечии грешки во минатото“, рече тој.