Одбојкарскиот репрезентативец и член на ОК „Струмица Никоб“, Владо Милев, е прогласен за најдобар спортист на Струмица за минатата година на синоќешната манифестација што се одржа во организација на Општинскиот сојуз на училишни спортови и под покровителство на Општина Струмица.
За најдобра екипа е прогласена ОК „Струмица Никоб“. За најдобар спортист во млади категории во екипен спорт е прогласена Теона Галабовска од ЖФК „Тиверија“, а првото место во оваа категорија го делат ОК „Наковски Волеј“ – младинки и ЖФК „Тиверија“ -кадетки.
Најдобар тренер во сениорска конкуренција во екипен спорт е Кирил Ричлиев од ОК „Струмица Никоб“ , а во млади категории за најдобра беше прогласена Теодора Димоска од ЖФК „Тиверија“.
Во категоријата најдобар спортист во индивидуалниот спорт првите места ги делат Славе Делиовски од КБК „Тим Зоран“ и Елена Биџева од ШКК „Шихан“, а во млади категории најдобар е Александар Делиовски од КБК „Тим Зоран“.
Најдобар тренер во индивидуалниот спорт е Зоран Спасов од КБК „Тим Зоран“, а во масовниот спорт екипно првото место му припадна на СОУ „Јане Сандански“ и поединечно на Борис Секулов.
Во своето поздравно обраќање градоначалникот Костадин Костадинов истакна дека малку се градовите во земјава кои можат да се пофалат со толку многу успешни спортски имиња и презимиња, познати репрезентативци и интернационалци кои ја испишувале македонската спортска историја.
Покрај прогласувањето на најдобрите и најуспешни спортски екипи, тренери и спортисти на Струмица, беа доделени плакети на спортски клубови кои во 2022 година прославуваа годишни јубилеи, на спортисти кои постигнаа значителен успех во масовниот спорт и поединци кои дале континуирана поддршка на струмичкиот спорт.
![](https://mia.mk/articles/images/%D0%BE%D0%B4%D0%B1%D0%BE%D1%98%D0%BA%D0%B0%D1%80%D0%BE%D1%82-%D0%B2%D0%BB%D0%B0%D0%B4%D0%BE-%D0%BC%D0%B8%D0%BB%D0%B5%D0%B2-%D0%B5-%D0%BD%D0%B0%D1%98%D0%B4%D0%BE%D0%B1%D0%B0%D1%80-%D1%81%D0%BF%D0%BE%D1%80%D1%82%D0%B8%D1%81%D1%82-%D0%BD%D0%B0-%D1%81%D1%82%D1%80%D1%83%D0%BC%D0%B8%D1%86%D0%B0-%D0%B7%D0%B0-%D0%BC%D0%B8%D0%BD%D0%B0%D1%82%D0%B0%D1%82%D0%B0-%D0%B3%D0%BE%D0%B4_tMJud/bIVtOVFIo/large.webp?use_watermark=0)
На поранешниот премиер Зоран Заев, сега директор на Фондацијата „Едно општество за сите“ и на градоначалникот Костадин Костадинов, спортистите им доделија благодарници за нивното помагање на струмичкиот спорт.