Во Регионалниот центар за гранични работи Југ во Кавадарци, министерот за внатрешни работи Оливер Спасовски денеска им посака добредојде и го поздрави присуството и официјално започнување на Заедничката операција „Северна Македонија 2023“ , на службениците на ФРОНТЕКС кои ќе бидат распоредени на границата кон Република Грција.
![ФРОНТЕКС, операција „Северна Македонија 2023“ 1](https://mia.mk/articles/images/%D1%81%D0%BF%D0%B0%D1%81%D0%BE%D0%B2%D1%81%D0%BA%D0%B8%D0%B8%D0%BC%D0%BF%D0%BE%D1%81%D0%B0%D0%BA%D0%B0%D0%B4%D0%BE%D0%B1%D1%80%D0%B5%D0%B4%D0%BE%D1%98%D0%B4%D0%B5%D0%BD%D0%B0%D0%BF%D0%BE%D0%BB%D0%B8%D1%86%D0%B8%D1%81%D0%BA%D0%B8%D1%82%D0%B5%D1%81%D0%BB%D1%83%D0%B6%D0%B1%D0%B5%D0%BD%D0%B8%D1%86%D0%B8%D0%BE%D0%B4%C2%A0%D0%B5%D0%B2%D1%80%D0%BE%D0%BF%D1%81%D0%BA%D0%B0vliBW/38OylgY1X/medium.webp?use_watermark=0)
Заедничката операција е предвидена да трае до 24. јануари 2024 година, со можност за нејзино продолжување, а има за цел поддршка на националните служби во граничната контрола и управувањето со миграциите, вклучувајќи ги и превенцијата, откривањето и спречувањето на прекуграничниот криминал, во прибирањето и размената на оперативни информации и идентификувањето на можни ризици и закани, јакнење на оперативната соработка и поддршка на оперативните капацитети.
„Очекуваме истата да придонесе за поефикасно справување со прекуграничниот криминал, вклучително и криумчарењето мигранти, трговијата со луѓе и тероризмот како глобални предизвици. Заедништвото на оваа операција се согледува и преку вложување во персонал и опрема за да обезбедиме поголема безбедност“, информираа од МВР.
Планирано е во текот на 2023 година ФРОНТЕКС да распореди повеќе од 100 службеници, патролни возила и специјална опрема на македонско-грчката граница со што значително ќе се зголемат капацитетите за откривање на илегалните активности вдолж границата, притоа почитувањето и заштитата на основните права на секое лице засегнато од операциите на ФРОНТЕКС е во центарот на активностите на агенцијата.
![ФРОНТЕКС, операција „Северна Македонија 2023“ 3](https://mia.mk/articles/images/%D1%81%D0%BF%D0%B0%D1%81%D0%BE%D0%B2%D1%81%D0%BA%D0%B8%D0%B8%D0%BC%D0%BF%D0%BE%D1%81%D0%B0%D0%BA%D0%B0%D0%B4%D0%BE%D0%B1%D1%80%D0%B5%D0%B4%D0%BE%D1%98%D0%B4%D0%B5%D0%BD%D0%B0%D0%BF%D0%BE%D0%BB%D0%B8%D1%86%D0%B8%D1%81%D0%BA%D0%B8%D1%82%D0%B5%D1%81%D0%BB%D1%83%D0%B6%D0%B1%D0%B5%D0%BD%D0%B8%D1%86%D0%B8%D0%BE%D0%B4%C2%A0%D0%B5%D0%B2%D1%80%D0%BE%D0%BF%D1%81%D0%BA%D0%B0KMs8s/B6YMNTdFB/medium.webp?use_watermark=0)
Во рамки на посетата на министерот Спасовски беше организиран и Првиот оперативен брифинг за припадниците на ФРОНТЕКС во заедничка координација на ФРОНТЕКС, Одделот за гранични работи и миграции и Регионалниот центар за гранични работи Југ, со што и официјално започнува Заедничката операција.
Министерот Спасовски на средбата со началникот на Регионалниот центар за гранични работи Југ, Славчо Богев во Кавадарци, на која биле присутни и сопственици на пет општествено одговорни фирми од Кавадарци, им доделил Благодарници за партнерство и успешна реализација на целите од заеднички интерес во модернизирање на капацитетите на МВР на Република Северна Македонија.
![Благодарници ФРОНТЕКС, операција „Северна Македонија 2023“ 1](https://mia.mk/articles/images/%D1%81%D0%BF%D0%B0%D1%81%D0%BE%D0%B2%D1%81%D0%BA%D0%B8%D0%B8%D0%BC%D0%BF%D0%BE%D1%81%D0%B0%D0%BA%D0%B0%D0%B4%D0%BE%D0%B1%D1%80%D0%B5%D0%B4%D0%BE%D1%98%D0%B4%D0%B5%D0%BD%D0%B0%D0%BF%D0%BE%D0%BB%D0%B8%D1%86%D0%B8%D1%81%D0%BA%D0%B8%D1%82%D0%B5%D1%81%D0%BB%D1%83%D0%B6%D0%B1%D0%B5%D0%BD%D0%B8%D1%86%D0%B8%D0%BE%D0%B4%C2%A0%D0%B5%D0%B2%D1%80%D0%BE%D0%BF%D1%81%D0%BA%D0%B0NQRGy/OQHexPSZV/medium.webp?use_watermark=0)