Општина Центар со 500.000 денари парична помош за Турција и Сирија

На предлог на градоначалникот на Општина Центар, Горан Герасимовски, општинските советници на денешната вонредна седница едногласно ја изгласаа Одлуката за доделување парични средства за настраданите од земјотресот во Турција и Сирија.

Финансиската помош од страна на Општина Центар во износ од 500.000 денари ќе биде донирана на посебна сметка на Фондот за солидарност на Црвениот крст на Република Северна Македонија и овие средства се доделуваат за хуманитарна помош во знак на солидарност за настраданите и нивните семејства во Турција и Сирија, соопшти општинската прес-служба.

– Во овие тешки денови за населението на Турција и Сирија, каде животите ги загубија речиси 16.000 жители, хуманоста и помошта се неопходни за побрзо и полесно справување со последиците и штетите настанати од разорниот земјотрес. Затоа би сакал јавно да апелирам до сите граѓани да се мобилизираме и да се вклучиме со донации за помош и поддршка за настраданите, изјави Герасимовски.

Средствата од Одлуката за доделување финансиски средства се издвојуваат од постојаната резерва на буџетот на Општина Центар за 2023-та година