Орбан: Унгарија наскоро ќе може да го ратификува влезот на Шведска во НАТО

Унгарскиот парламент ќе може да го ратификува влезот на Шведска во НАТО на почетокот на нејзината пролетна сесија подоцна во февруари, изјави премиерот Виктор Орбан пред приврзаниците во саботата.

„Добрата вест е дека нашиот спор со Шведска наскоро ќе биде решен“, рече Виктор Орбан во својот главен говор. „Одиме во насока на ратификување на приемот на Шведска во НАТО на почетокот на пролетната парламентарна сесија“, додаде тој.

Орбан рече дека тој и шведскиот премиер Улф Кристерсон презеле чекори за „враќање на довербата“ меѓу земјите, но тој не даде детали.

Шведска поднесе барање за членство во НАТО во мај 2022 година во историска промена на политиката поттикната од руската инвазија на Украина.

Унгарија е единствената членка на НАТО која се уште го нема ратификувано барањето на Шведска, процес кој бара поддршка од сите членки на НАТО.

Ова ги влоши односите со САД и предизвика загриженост кај сојузниците.

Владејачката партија Фидес на Орбан рече дека „неоснованите“ шведски обвинувања за поткопување на демократијата во Унгарија се причината поради која Шведска сè уште не добила зелено светло.

Орбан, кој има подобри односи со Русија отколку со некои членки на ЕУ и повеќето членки на НАТО, постојано изјави дека неговата влада го поддржува влезот на Шведска во НАТО, но процесот на ратификација е заглавен во унгарскиот парламент од средината на 2022 година.

Се очекува Парламентот повторно да заседава на 26 февруари.