ОСТРА ОСУДА ОД ЕУ – Европскиот парламент ја усвои Резолуцијата за Србија: Целосно го разобличија Александар Вучиќ, а се споменуваат и санкции
Европскиот парламент усвои специјална Резолуција за состојбата на дијалогот меѓу Косово и Србија и последните настани на северот на Косово. Текстот на Резолуцијата го состави хрватскиот пратеник Тонино Пицула врз основа на предлозите испратени од политичките групи во Европскиот парламент.
Европскиот парламент вообичаено ја критикува Србија, за разлика од Европската комисија и Службата за надворешни работи на ЕУ, кои упорно ја штитат Владата во Белград, но ова е несомнено најкритичната резолуција кон Србија. Во текстот на резолуцијата, настаните во селото Бањска на северот на Косово од 24. септември се нарекуваат „терористички напад“ извршен од „добро вооружена српска паравоена група“.
Европскиот парламент ја повикува Европската комисија и Советот да воведат санкции кон Србија доколку се утврди директна поврзаност на Србија со овој напад или ако Србија не покаже искрена волја да соработува во истрагата.
Советот на ЕУ, исто така, повикува на воведување насочени санкции против лицата одговорни за дестабилизацијата на северно Косово, вклучувајќи забрани за патување и замрзнување на имотот.
Во резолуцијата на Европскиот парламент се осудува и јазикот на омраза што во Србија го користат властите и медиумите кон Косово. Тој ги повикува да не шират невистини за „етничко чистење“ или „погром“ за кои нема докази. Тој го осудува и прогласувањето Ден на жалост во Србија за убиените напаѓачи, како и нивното величење.
Европскиот парламент остро го осуди трупањето на српската војска кон границата со Косово, што укажува на голема ескалација.
„Европскиот парламент нагласува дека ваквото агресивно воено однесување, заедно со радикализираните политички пораки во Србија и силните индиции за вмешаност на српската држава во неодамнешното политичко насилство на северот на Косово, укажуваат на многу опасна, но кохерентна политика на српската Влада кон Косово и неговите западни партнери“, се вели во Резолуцијата.
Со оваа Резолуција, Европскиот парламент ја изрази својата загриженост поради дестабилизирачкото влијание на српските власти предводени од претседателот Александар Вучиќ врз целиот регион, како и обидите на Русија да влијае негативно на регионот, особено во односите меѓу Србија и Косово и повикува на истрага за можната улога на Русија во неодамнешните настани на северот на Косово.
„Европскиот парламент ја повикува Европската комисија да дејствува како чесен посредник во процесот на нормализација и да избегнува каква било политика на смирување кон Србија“, пишува во Резолуцијата, во која се изразува и загриженост поради немањето јасни критики од Европската комисија и покрај неусогласеноста на Србија со политиката на надворешните позиции на ЕУ и санкциите против Русија.
Во Резолуцијата европратениците изразија жалење за негативните мерки што ЕУ ги презема против Косово и повикаа на нивно отстранување што е можно поскоро.
