Позната фирма отпушти 7.500 работници: Тие смислиле план за заштеда и одвоиле дел од бизнисот со сладолед

Британскиот Унилевер соопшти дека ќе го прекине својот бизнис со сладолед, дом на популарните брендови како што се Magnum и Ben & Jerry’s, но и ќе укине околу 7.500 работни места како дел од новиот план за намалување на трошоците.

Инвеститорите добро реагираа на оваа објава, а акциите на една од најголемите светски компании во секторот на производи за широка потрошувачка во вторникот во еден момент пораснаа за речиси шест отсто.

Таканаречениот „спиноф“, односно одвојување на производството на сладолед во посебна деловна единица, ќе започне веднаш и се очекува да биде завршен до крајот на 2025 година, објави „Унилевер“.

Бизнисот со сладолед е „во процес на преселба во посебно седиште во Амстердам“, но извршниот директор Хајн Шумахер на прес-конференција рече дека е „отворен за други опции“.

Унилевер соопшти дека има за цел едноцифрен раст на продажбата од 5-9 отсто и скромно подобрување на профитните маржи по поделбата. Бизнисот со сладолед учествува со околу 16 отсто од глобалната продажба на Унилевер, а во некои земји значително повеќе.

Групата, чии други брендови вклучуваат сапун Dove, Marmite и Hellmann’s зачини, исто така започна програма за заштеда на трошоци од околу 800 милиони евра во следните три години. Предложените промени ќе влијаат на околу 7.500 работни места ширум светот, главно во канцеларии, при што вкупните трошоци за реструктуирање се очекува да бидат околу 1,2 отсто од вкупниот промет во периодот.