Поплавени се повеќе куќи, магацини и индустриски капацитети во Студеничани и Батинци

Регионалниот центар за управување со кризи – Скопје соопшти дека поради врнежи од дожд вчера во доцните попладневни и вечерни часови е зголемено нивото на Маркова Река, што предизвика излевање на мостот кај населбата Лубош и низводно, како и поплавување на повеќе куќи, магацини и индустриски капацитети во селата Студеничани и делови од Пинтија, како и во Батинци.

Поплави се пријавени и во дел од булеварот Борис Трајковски кај населбата Пинтија, каде исто така има информации за поплавување на магацини. Според информациите од лицето за контакт од локалната самоуправа Студеничани, службите на локалната самоуправа Студеничани интервенирале кај локални фирми, а на терен беа и претставници од локалната самоуправа Кисела Вода.

На единствениот број за итни случаи 112 во текот на ноќта пристигнале пријави за поплавување на куќи во Горно Лисиче (општина Аеродром), каде интервенирала и локалната самоуправа во Аеродром.

Исто така, во поплавените подрачја интервенираат и ППБ на Град Скопје и Јавните претпријатија на Град Скопје и единиците на локалната самоуправа.