Продолжен притворот за нови 30 дена на таткото на момчето кое изврши масовно убиство во белградско училиште

Вишиот суд во Белград му го продолжи притворот за нови 30 дена на В. К., татко на 13-годишниот К. К. кој на почетокот на мај уби девет ученици и чувар во ОУ „Владислав Рибникар“ во Белград, соопштено е денеска.

Во образложението на судот се наведува дека мерката притвор му е продолжена „поради постоење на посебни околности кои укажуваат дека во случај да биде пуштен на слобода во краток рок ќе го повтори кривичното дело како и со оглед дека постои основано сомневање дека сторил кривично дело за кое е пропишана затворска казна од над десет години, а начинот на извршување и сериозноста на последиците од кривичното дело доведоа до вознемирување на јавноста што се заканува за непречено и правично водење на кривичната постапка“.

В. К. е обвинет за тешко кривично дело против општата безбедност, бидејќи една година пред масовното убиство во ОУ „Владислав; Рибникар“ го обучувал својот син да ракува со огнено и воздушно оружје.

„Против решението за продолжување на притворот, дозволена е жалба до Апелациониот суд во Белград, во рок од три дена од приемот на решението“, соопшти Вишиот суд.