Расветлен случајот со копање тунел до Вишиот суд, поднесена кривична пријава против шест лица
– Црногорската полиција поднесе кривична пријава против шест лица, претежно државјани на Србија, осомничени дека ископале тунел до депото на Вишиот суд во Подгорица, изјави министерот за внатрешни работи Филип Аџиќ, наведувајќи дека постои поврзаност на осомничените со едно лице од Вишиот суд.
Аџиќ на прес-конференцијата рече дека го решиле случајот со копањето тунел и ги идентификувале лицата кои биле инволвирани во тие криминални активности.
Според неговите зборови, повеќето се од Србија, а имале „одредени помагачи од Црна Гора“.
„Информациите што ги добивме откриваат дека во ова кривично дело учествувале Вељко Марковиќ (32 години), Милан Марковиќ (53), Дејан Јовановиќ (30) и Владимир Ериќ (32), кои се државјани на Србија, како и две неидентификувани лица“, рече Аџиќ и ги покажа фотографиите на четворицата осомничени.
Тој додаде дека овие лица веднаш по извршувањето на делото ја напуштиле Црна Гора, што ги спречило црногорските власти да ги уапсат.
„Постои одредена поврзаност на оваа организација со едно лице од Вишиот суд и со лица кои моментално се во Управата за извршување санкции – УИКС, а кои се поврзани со една од најмоќните криминални организации во државата“, изјави Аџиќ.
Тој истакна дека во тоа кривично дело учествувале уште најмалку пет лица кои биле логистика или давале друг вид поддршка.
Аџиќ покажа и фотографија од женско лице кое е поврзано со случајот, наведувајќи дека е државјанка на Црна Гора и дека немаат информации дека ја напуштила државата.
Тој рече дека надлежните имаат трага што ги води до сторителите. Аџиќ рече дека квалификуваните дела се злосторничко здружување, тешка кражба и спречување докази извршени на штета на Вишиот суд.
„Квалификацијата на овие дела е многу важна со оглед на тоа што најголем дел од лицата не се од територијата на Црна Гора и не се во нашата земја, така што во иднина во активности со партнерските служби овие лица би биле уапсени и екстрадирани во Црна Гора за да се дојде до нарачателот на ова тешко кривично дело“, нагласи Аџиќ.
Црногорскиот министер за внатрешни работи рече дека со понатамошните активности треба да се утврди дали лицето од Вишиот суд учествувало во криминална организација или постои само поврзаност.
„Со оглед на тоа што веќе имаме одредена поврзаност меѓу луѓето од Вишиот суд, криминалната организација која копаше и оние кои остануваат во УИКС, на чекор сме до откривање на вистинскиот мотив за копање на тунелот и упад во депото“, додаде Аџиќ.
Тој наведе дека повеќето од осомничените имаат криминално минато и се со криминално досие на други држави, а на денот на извршувањето на делото ја напуштиле Црна Гора преку легални премини.
Аџиќ изјави дека службениците на полициската управа и на Основното државно обвинителство во Подгорица дале сѐ од себе и дека деноноќно работеле на расветлување на грабежот во депото на Вишиот суд.
„Покажавме дека Црна Гора, кога функционира заедно и кога постои синергија меѓу институциите за заедничка работа, може да открие такви сложени криминални дела кои се планирани со месеци или подолго и во кои се инвестирани стотици илјади евра“, изјави Аџиќ.
Министерот, одговарајќи на прашања на новинарите, рече дека нема да бара оставка од претседателот на Вишиот суд, Борис Савиќ.
„Имам информации дека Савиќ ги користел клучевите од депото и дека морал да биде запознаен со сите што останале во депото, а понатамошната истрага ќе покаже дали има некаква врска со него.“
„Немаме информации дека Савиќ е поврзан со овие криминални активности“, рече Аџиќ.
На прашањето дали откривањето на тунелот ги спречило членовите на криминалната група да продолжат со своите активности и дали имале дојава па ја напуштиле Црна Гора или го завршиле кривичното дело, Аџиќ рече дека претпоставува дека нема да има одговор на тие прашања до крајот на процесот.
Аџиќ смета дека областа каде што се наоѓа Вишиот суд требало да биде под „будно око“ на луѓето вклучени во разузнавачки активности.
Обвинителот Марко Мугоша рече дека поднесувањето на пријавата не запира, туку само ја „подгрева“ работата на случајот во однос на откривање на непознатите сторители.
