Родителите на жртвите во Кочани бараат одговорност и целосно правно решавање на случајот

Родителите на децата кои трагично загинаа во катастрофата што се случи во дискотеката „Пулс“ во Кочани на 16 март испратија писмено соопштение до јавноста во кое изразуваат длабока болка, но и заедничко и јасно барање за целосно законско решение и одговорност од сите вклучени лица и институции.

„Оваа трагедија ја карактеризираме како масовно убиство и сериозна закана по човечкиот живот и безбедност и бараме надлежните институции да дејствуваат професионално, непристрасно и во согласност со важечките закони и меѓународните конвенции. Целосно се дистанцираме од каква било политичка манипулација и не дозволуваме овој трагичен настан да се користи за стекнување политички поени од кој било субјект, без разлика дали од владата или од опозицијата. Бараме веднаш да се спроведе независна и целосна истрага за сите околности поврзани со настанот, со цел да се утврди дали биле почитувани сите законски норми и прописи за работењето на објектот.“

„Сакаме да знаеме дали дискотеката имала валидна оперативна документација, дали надлежните инспекциски служби ги извршиле сите потребни проверки и дали постапила во согласност со законот во однос на урбанистичкото планирање, градежништвото, санитарните услови, безбедноста и противпожарните стандарди. Потребно е да се утврди дали нечија небрежност, злоупотреба или незаконско дејствие довеле до оваа трагедија“, се вели во соопштението.

Родителите нагласуваат дека се подготвени да соработуваат со истакнати локални и странски адвокати кои ќе обезбедат правна поддршка во сите фази од процесот, вклучително и евентуалното покренување на случајот пред Европскиот суд за човекови права во Стразбур.

За сабота, 10 мај, во Кочани е најавен нов протест, „Марш за ангелите“, кој ќе започне во 16:05 часот, симболизирајќи го одложениот институционален одговор.