Руски саботери во Германија планирале напад врз воен транспорт: Ја шпионирале американската база каде се обучуваат украински војници (фото)
Јенс Ромел, германскиот федерален обвинител, објави дека во Бајројт се уапсени две лица осомничени дека се руски шпиони.
Билд пренесува дека апсењето било извршено вчераутро.
Се вели дека двајцата мажи шпионирале американски бази таму за рускиот претседател Владимир Путин и дека планирале напади на воени транспортни рути.
Главен обвинет е Германецот со руско потекло Дитер С.(39), кој се товари за шпионирање во корист на тајната служба, шпионирање со цел саботажа и „опишување“ воени објекти на начин кој ја загрозува нивната безбедност.
Се наведува дека Дитер С. е конкретно обвинет дека бил во контакт со припадник на руската тајна служба и дека работел со него на плановите да изврши саботажа во Германија од октомври 2023 година.
Според германскиот федерален обвинител, Дитер С. се согласил да изврши експлозивни напади и да подметне пожари во воени и индустриски објекти во Германија.
Во тоа време, Дитер С. веќе собрал информации за потенцијални цели за напад, вклучувајќи ги и американските воени инсталации.
Се вели дека тој дури и лично извршил извидување на некои од целите каде фотографирал воен транспорт и правел видеа.
Германскиот магазин Шпигел објави дека меѓу воените објекти што ги шпионирал е и американската база во Графенвер, Баварија.
Меѓу другото, тука е и важен полигон каде американската војска ги обучува украинските војници.
Се вели дека другиот обвинет е Александар Ј. (37), германски државјанин со руско потекло, кој исто така е обвинет од федералните обвинители дека дејствувал како агент на странска тајна служба.
Тој е обвинет дека до март годинава го поддржувал Дитер С.
Шпигел наведува дека апсењето на двајцата го извршиле специјални полициски сили.
Се наведува дека Дитер С. вчера бил изведен пред истражниот судија на Сојузниот суд на правдата во Карлсруе, кој му одредил притвор до судењето, додека денеска пред истиот судија беше изведен и Александар Ј.
