САД: Постигнат е договор за зголемување на лимитот на долгот

Џо Бајден и Кевин Мекарти постигнаа начелен договор за избегнување економска рецесија, загрозување на пензиските фондови и губење милиони работни места.

Американскиот претседател Џо Бајден и претседателот на Претставничкиот дом Кевин Мекарти постигнаа начелен договор за зголемување на лимитот на долгот, јавува Анадолија.

Бајден рече дека договорот ги штити неговите приоритети и оние на демократите во Конгресот и е „важен чекор напред кој ги намалува трошоците додека ги штити клучните програми за работниците и економскиот раст“.

„Договорот претставува компромис, што значи дека не секој го добива она што го сака. Тоа е одговорност на владата“, рече тој.

Тој нагласи дека овој договор е добра вест за американскиот народ, бидејќи го спречува она што можеше да биде катастрофална економска рецесија, загрозување на пензиските фондови и губење на милиони работни места.

Белата куќа и конгресните тимови ќе го финализираат договорот во недела пред гласањето во Претставничкиот дом и Сенатот следната недела.

„Ова е договор достоен за американскиот народ“, рече Мекарти, додавајќи дека нема да ги зголемува даноците.

Договорот дојде откако министерката за финансии Џенет Јелен во петокот рече дека САД ќе останат без пари за да ги платат своите финансиски обврски до 5 јуни.