САД ја предупредија Турција, Ердоган одговори

Турскиот претседател Реџеп Таип Ердоган рече дека не го смета Хамас за терористичка организација и ги отфрли американските критики за поддршката на неговата влада за Хамас дури и по нападот на милитантната група врз Израел на 7 октомври.

„Никогаш нема да можам да го прифатам Хамас како терористичка организација, без разлика што некој ќе каже“, им рече Ердоган на новинарите на враќање од самитот COP28 во Дубаи.

Ердоган одговараше на прашањето за предупредувањето од потсекретарот за тероризам на американското Министерство за финансии Брајан Нелсон за „загриженоста“ на Вашингтон за поддршката на Турција за Хамас. Нелсон го изјави ова за време на неодамнешната посета на Анкара. Локалните медиуми, вклучително и Ајдинлик, ги опишаа изјавите на Нелсон како потенцијална закана од санкции против Анкара.

„Ние ја креираме нашата надворешна политика во Анкара и ја креираме исклучиво во согласност со интересите на Турција и очекувањата на нашиот народ“, додаде Ердоган, соопшти неговиот кабинет. Хамас „е реалноста на Палестина, таа е политичка партија која излезе на избори и победи“, рече турскиот лидер.

„Сигурен сум дека нашите соговорници ги ценат конзистентните и урамнотежени надворешнополитички чекори на Турција во вакви хуманитарни кризи и конфликти“, додаде тој.