Се продава капата што Мајкл Џексон ја носел кога првпат го извел moonwalk
Капата што ја носеше Мајкл Џексон кога првпат го изведе својот познат танцов потег „Moonwalk“ ќе биде понудена на аукција на 26 септември во Париз, објавија организаторите на продажбата. Парчето, проценето на меѓу 60.000 и 100.000 евра, ќе биде атракција на аукцијата на рок сувенири во Hôtel Drouot, главната аукциска куќа во Париз.
Аукцијата ја организираат компаниите Artpèges и Lemon Auction, кои минатата година предизвикаа сензација со гитарата на Ноел Галагер, скршена ноќта кога се распадна Oasis, продадена за 385.500 евра со трошоци.
Работите на Мадона исто така се на аукција
На аукција ќе бидат понудени околу 200 предмети – фотографии, постери, билети за концерти, златна плоча на Мадона, винтиџ гитари, костими на Мартин Гор од групата Депеш Мод. Каталогот за продажба ќе биде онлајн на 4 јули на lemonauction.fr.
Меѓу другите дела на аукцијата ќе биде и гитарата на T-Bone Walker произведена во само 22 примероци во 1949 година. Инструментот е проценет помеѓу 100.000 и 150.000 евра. Ќе има и дел од ѕидот на парискиот клуб Бус Паладиум затворен во 2022 година со неколку потписи на музичари проценети меѓу 5.000 и 8.000 евра.
