Спасовски: Важен е Законот за критична инфраструктура во борбата против сајбер заканите
Во емисијата „Вин вин“ на Телма телевизија, министерот за внатрешни работи Оливер Спасовски беше прашан за состојбата во овој момент по однос на сајбер заканите.
„Сосема логично е прашањето и темата да биде приоритет на сите нас, на институциите. Во право сте кога говорите дека недоволно или многу малку посветувавме време на прашањето на сајбер безбедноста. Тоа не е само прашање на Северна Македонија, тоа е прашање на сите држави во регионот и пошироко во ЕУ. Бидејќи, ако ги погледнеме наназад, до пред 5 години ретко кога на било која министерска конференција разговаравме за сајбер безбедност и за градење на капацитетите кои би биле одговор во делот на сајбер безбедноста. Сега изминативе години веќе нема конференција на која не се разговара и на која не се градат заеднички политики”, рече министерот Спасовски напоменувајќи ја соработката со САД и со ЕУ, како дел од процесот на пристапување.
„Меѓутоа, во билатералната соработка со сите држави, регионот и светот, еден од приоритетите мора да биде сајбер безбедноста. Зошто?! Затоа што од безбедносен аспект тоа се предизвици на долг рок на глобално ниво. Како што е тероризмот, како што е миграцијата, на исто ниво е и сајбер безбедноста и, секако, организираниот криминал и корупцијата. Во тој дел е многу важно при предвидливоста на заканите да се земе предвид сето она што значи справување со сајбер безбедноста. Исклучително важно е да се заштитат институциите и критичната инфрастурктура на државата. Анализите покажуваат дека сајбер нападите, хибридите војни можат да бидат многу поразорни дури и од конвенционалните војни, затоа што иако како граѓани не перцепираме голема закана, сепак сајбер напад на било која институција може сериозно да го загрози нормалниот живот на граѓаните”, нагласи министерот Спасовски.
Осврнувајќи се на заштитата на критичната инфраструктура, министерот Спасовски рече:
„Како никој друг предизвик во делот на безбедноста ни покажува дека практично безбедноста сме сите ние! И како граѓани и како институции. Критичната инфраструктура е нешто што апсолутно мора да биде заштитено и затоа се предлага да се донесе Закон за заштита на критичната инфраструткура, а тоа е и како обврска од делот на ЕУ и нашето пристапување. Јас сум задоволен што пред неколку години првпат ја отворивме дискусијата за критична инфраструктура, благодарение на соработката со научната јавноста и тука сакам јавно да се заблагодарам на професорката Марина Митреска која практично иницираше една дебата и организација на конференција за критична инфраструктура, кога првпат во Република Северна Македонија отворивме дебата колку е важно да имаме Закон за критична инфраструктура, да изградиме механизми на заштита на критичната инфраструктура или отпорност на самата критична инфраструктура. На тоа следуваа многу активности кои беа понатаму преземени во делот на анализи, вклучување на научната јавност. Секако, Министерство за одбрана заедно со други институции го подготвува законот. Многу е важно преку тој закон да се дефинира што значи критична инфраструктурата, колку би бил обемот на опфат и заштита во државата”, истакна министерот Спасовски.
Министерот за внатрешни работи Оливер Спасовски, гостувајќи во емисијата „Вин-вин“ на ТВ Телма, беше запрашан за присуството на наркотични средства на македонскиот пазар како нов притисок кој ги прави уште поранливи младите генерации.
Укажувајќи на неопходноста да се подигне нивото на будност на институциите кога станува збор за присуството наркотични средства коишто можат да бидат и блиску до младите, министерот Спасовски истакна: „Да, ние имаме зголемување во делот на откривачката дејност, интензивно се работи во тој дел. Ако погледнеме споредбено со години, 2011-2015 вкупно беа констатирани некаде околу 89.000 кривични дела, а 2017-2022 сме имале 98.000 кривични дела, бројот на сторителите е зголемен скоро за 2000. Или, 3.700 сторители во претходниот период 2011-2015, додека во 2017-2022 е 5.094“.
Во делот на спречување на недозволената трговија со дрога, министерот Спасовски посочи дека откривачката дејност е зголемена за 9,3 отсто, а ефикасноста на полицијата некаде за 37,2 отсто што, според него е показател дека нивото на поставеност на службите е многу повисоко од тоа што било претходно.
Тој потсети дека токму периодов пред една година на скопскиот аеродром беа запленети околу 1.000 килограми прекурсори со многу висок степен на квалитет, од коишто можеа да бидат произведени синтетички видови на дрога, а проценката на цената е некаде околу 160 милиони евра, што доволно говори за сериозниот пристап на институциите.
На прашањето за промената на амбиентот во градот, карактеризирана со враќање на нормалното, мир и спокој кај населението, благодарение на тивките полициски акции по угостителските објекти, при што е избрана стратегија без робусно влегување, легитимирање, претресување, министерот Спасовски подвлече дека многу е важно мирот и спокојот на граѓаните да бидат присутни секој ден и секој момент, а апсолутно е недозволиво одредена категорија на криминогени структури да можат да вршат насилство врз граѓаните.
„И токму заради тоа, знаете, минатата година реализиравме една оперативна акција која ја нарековме ‘Безбедно лето’, која имаше за цел да влијае на зголемувањето на безбедноста на територијата на државата и тоа ќе се работи и оваа година и, секако, посебно за град Скопје, оперативната акција која ја реализираме се нарекува ‘Безбеден град’. И тука учествуваат низа оддели од МВР со коишто преку одбрана стратегија и дефинирани таргети одиме кон континуирана контрола. И тука сакам да кажам дека ова нема да застане! Ние перманентно работиме во секој еден дел и секој еден сегмент во градот безбедноста биде на задоволително ниво“, рече Спасовски.
Тој во интервјуто додаде дека историски земено, постоењето на криминални групи е од многу одамна, но најмалку сега може да стане збор дека тие групи се толку моќни што ќе ги дефинираат одредени состојби во државата, бидејќи колку ќе дозволите таа група да биде моќна, толку ќе биде големо и нејзиното влијание.
„Најважното е колку вие ќе работите за да се спротивставите на таквите активности. Колку ќе бидете посветени и решителни да се справите со тој феномен. И токму заради тоа мислам дека одлуките коишто ги донесовме, ова што перманентно го работиме во целиот овој период, состојбата којашто се чувствува генерално во градот и државата, покажува дека никој никогаш не може да биде посилен од државата. Многу е важно како ќе работите и што сакате да постигнете во овој дел. Така што, уште еднаш напоменувам – нема поединец и нема да дозволам да има поединец којшто може да биде над институциите и државата!“, порача министерот Спасовски.