Спасувачите влегуваат во трка со времето: На исчезнатите во подморницата им остануваат уште неколку часа кислород

Спасувачката акција во потрага по исчезнатата подморница Титан продолжи во средата и четвртокот, а спасувачите сега влегуваат во вистинска борба со времето имајќи предвид дека на исчезнатите лица во подморницата им остануваат уште неколку часа кислород.

Американската крајбрежна стража во средата објави документи кои покажуваат дека областа досега била претресувана, но без голем успех.

„Кога сте среде случај за пребарување и спасување, секогаш имате надеж“, рече капетанот на американската крајбрежна стража Џејми Фредерик.

Она што ги израдува спасувачите е информацијата дека во областа за пребарување се слушнале дополнителни подводни звуци, кои можеби укажуваат дека подморницата е во близина.

„Засега не знаеме точно кои се звуците, но надежта мора да се одржи“, рече Фредерик.

Тој исто така нагласи дека во текот на ноќта и денот областа за пребарување ќе се прошири на повеќе од 28.700 квадратни километри.

Сепак, денес спасувачите влегуваат во вистинска трка со времето, имајќи го предвид фактот дека, според пресметките, во подморницата останува кислород за патниците уште неколку часа или до 7 часот по источно време или 13 часот средноевропско време.

„Една од причините поради кои се сомневам дека подморницата можеби нема да излезе на површина по фрлањето на товарот „ослободување“ може да биде тоа што може да биде делумно поплавена. Ако имате вода во трупот, тоа е прилично голем волумен. Патниците може да станат хипотермични, а јас не бев сигурен колку добро функционираат системите за чистење со CO2 доколку дојдат во контакт со вода“, изјави инженерот Рон Алум за „Гардијан“.

Во зоната за пребарување моментално има неколку меѓународни спасувачки тимови, а областа од воздух ја следат канадски авиони P-3, кои се најзаслужни за идентификување на изворот на звукот што доаѓа од морските длабочини.