Татко од Палестина од морничавото видео од пред 23 години, повторно ги погребува блиските: Синот на Џамал му го убија во скут, а сега ги оплакува и браќата (видео)
Џамал ал Дура жали за двајца членови на семејството убиени во израелските воздушни напади врз Газа додека неговите очи ја покажуваат длабочината на очајот.
Татко од Палестина пред 23 години бил снимен со неговиот син Мохамед, кој тогаш имал 12 години, како се крие зад бетонски блок на улица во Газа додека израелските сили пукале кон нив.
Снимката снимена од Талал Абу Рахма, француски телевизиски снимател, го прикажува Џамал како се обидува да го заштити своето дете од вкрстен оган додека тој вриска од ужас.
Неколку моменти подоцна одекнала експлозија, а по расчистувањето на чадот, во скутот на тешко повредениот татко било забележано неподвижно момче.
Снимките од тоа убиство го шокираа светот и тие две станаа симболи на второто палестинско востание.
Сега, години подоцна, Џамал повторно се справува со тагата додека закопува членови од своето семејство.
На видеото објавено на Твитер се гледа како тој стуткан седи покрај две тела покриени со бели чаршафи за кои се вели дека се негови браќа.
– Господ нека ти олесни. Збогум. Господ да ве помилува вас и сите маченици. Господ да ни даде трпение – вели Џамал.
Ова е еден од најшокантните моменти снимени од камерите откако Израел започна одмазднички напади врз Појасот Газа пред повеќе од една недела.
Џамал, столар и сликар од Газа, беше погоден со 12 куршуми на 30 септември 2000 година и помина со месеци закрепнувајќи се во болница. Сега тој е еден од десетиците илјади жители на Газа кои ги преживуваат ужасите на напорите на Израел да го уништи Хамас.
Во едно од ретките интервјуа, Џамал изјави дека видеата на неговиот син сведочат за стотици убиства на Палестинци кои главно остануваат без документи.
– Светот не го заборави мачеништвото на мојот син. Никогаш нема да заборави – изјави Џамал.
Жителите на Газа, под контрола на Хамас, изјавија дека нападите во текот на ноќта биле најтешките досега во последните девет дена од конфликтот. Беа урнати цели населби, а повеќе од 1.000 луѓе исчезнаа под урнатините на зградите. Бројот на загинати се искачи на 2.750, додека бројот на ранети цивили надмина 10.000.
Здравствените власти во Газа почнаа да складираат тела во камиони со сладолед бидејќи мртовечниците немаат простор.
Видеата објавени на интернет, исто така, покажуваат дека телата завиткани во бела ткаенина се закопани во масовни гробници.
