Тајни документи и НАТО планови за Украина протекоа во јавноста
Соединетите држави, наводно, се обиделе да ги отстранат документите, но до четвртокот вечерта тие напори биле неуспешни.
Пентагон истражува протекување на доверливи документи на социјалните мрежи за плановите на САД и НАТО во врска со контраофанзива на украинската војска. Ова го објави Њујорк Тајмс, повикувајќи се на функционерите на администрацијата Џо Бајден, пренесе Укринформ.
Фотографиите со шеми на очекуваното снабдување со оружје, бројот на војниците и други планови неодамна се објавени на Твитер и Телеграм.
Соединетите држави, наводно, се обиделе да ги отстранат документите, но до четвртокот вечерта тие напори биле неуспешни.
„Свесни сме на извештаите за објави на социјалните мрежи и одделот тоа го разгледува“, изјави гласноговорничката на Пентагон, Сабрина Синнгх.
Документите не содржат конкретни борбени планови, во врска со тоа, кога и каде украинската војска ќе покрене офанзива, туку само ги прикажуваат потребите на украинските вооружени сили од 1 март. Во документите се спомнува колку муниција му треба на ХИМАРС.
Не е јасно како документите се појавиле на социјалните мрежи. Документите кои ги објавија руските извори можеби делумно се изменети за да се прикрие реалната ситуација со губитоците на руските војници и да се преувеличуваат губитоците на украинските вооружени сили.
Документот под ознаката „строго доверливо“ содржи информации за ситуацијата од 1 март. Друг документ дава попис на украинските воени единици, опрема и обука планирана за периодот јануари-април.
Во документот се напоменува дека доцнењето во испораката на воената опрема нема да влијае на обуката и спремноста за извршување задачи на време.
TRT Balkan
