Украина ја повика Русија да им дозволи на ОН и Црвениот крст да пристапат до Херсон за евакуација од поплавите

Украинскиот амбасадор во ОН изрази длабока загриженост поради објавеното гранатирање на Херсон во Јужна Украина за време на евакуацијата од областите поплавени по уништувањето на браната „Каховка“.

Украина ја повика Русија да даде „непречен пристап“ за ОН и Црвениот крст за евакуација на цивилите по уривањето на големата брана на териториите на земјата контролирани од Русија, јавува Анадолу.

Украинскиот амбасадор во ОН, Сергиј Кислижа, на кој му се придружија САД, Велика Британија, Јапонија и европските земји, изрази „длабока загриженост“ поради објавеното гранатирање на Херсон во Јужна Украина за време на евакуацијата од областите поплавени по уништувањето на браната „Каховка“.

„Најмалку девет лица, вклучително полиција и медицински и спасувачки персонал, се ранети вчера во градот како резултат на гранатирањето за време на тековната операција за евакуација“, рече тој, цитирајќи ги локалните власти.

Кислижа остро го осуди гранатирањето на областите за евакуација и ја повика Русија да престане со таквите напади и да им дозволи на тимовите за евакуација безбедно да му помогнат на погоденото цивилно население.

Тој, исто така, повика на „целосна соработка“ и „непречен пристап“ до меѓународните актери, вклучително и ОН и Меѓународниот комитет на Црвениот крст за евакуација на цивилите.

Украина и Русија ја разменија вината за уништувањето на големата брана, во која одекна експлозија во вторникот.