Украинскиот претседател Зеленски: „Сега не е вистинско време за избори“

 – Украинскиот претседател Владимир Зеленски рече дека смета дека моментно не е вистинско време за одржување претседателски избори бидејќи земјата е заглавена во конфликт со Русија.

„Сметам дека сега не е вистинско време за избори. И ако треба да ставиме крај на политичкиот спор и да продолжиме да работиме во единство, постојат структури во државата што можат да му стават крај на тоа и да му ги дадат на општеството сите потребни одговори“, рече Зеленски за време на синоќешното обраќање.

Претседателските избори во Украина се одржуваат на секои пет години и треба да се организираат во март 2024 година. Но во земјата во моментов владее воена состојба поради вооружениот конфликт со Русија, кој започна во февруари 2022 година.

Украинскиот претседател рече дека е „апсолутно неодговорно“ да се говори за одржување избори на несериозен начин кога има „толку многу предизвици“ во време на војна.

„Очекувам сите релевантни структури и власти да дадат конкретни решенија за предизвиците со кои се соочува нашата земја денес. Ова се однесува на цивилните власти, воениот елемент во државата, владините претставници, Врховната Рада на Украина, Службата за безбедност на Украина и другите агенции за спроведување на законот“, додаде Зеленски.

Тој истакна дека државата треба повеќе да се фокусира на одбраната, додавајќи дека „брановите на какви било политички поделби мора да престанат“.

„Мора да сфатиме дека сега е време за одбрана, време за битка што ја одредува судбината на државата и народот, а не време на манипулации, кои само Русија ги очекува од Украина.“

Зеленски претходно изјави дека ќе се кандидира за втор мандат ако продолжи конфликтот со Москва.