ФОТО | Зачекорете во пеколот на Земјата – Русите постојано отвораат нови затвори: Уапсените Украинци се тепани, гушени и малтертирани со електрошокери
Илјадници украински цивили се приведени ширум Русија и окупираните украински територии, а руската Влада планира да основа уште 25 нови затворски колонии и шест притворски центри во окупирана Украина до 2026 година.
Покрај тоа, претседателот на Русија, Владимир Путин, во мај потпиша указ за олеснување на неодредено депортирање на Украинците длабоко во Русија, што се случи во неколку случаи, според документите на руската Влада до кои имале пристап новинарите на Associated Press (AP).
Истрагата на новинарите на AP покажува дека многу цивили биле уапсени за прекршоци како што е зборувањето украински јазик и често биле држени во затвори без обвинение. Други се обвинети како терористи, борци или луѓе кои „нудат отпор на специјална воена операција“, а тоа се мотиви кои се користат од руската Армија за ропска работа, копање ровови и дури копање на масовни гробници.
Мачењето на Украинците стана рутина, вклучувајќи струен удар, тепање и симулирано задушување. Извештајот на Обединетите нации од крајот на јуни документираше 77 кратки егзекуции на цивилни затвореници и смрт на еден затвореник поради тортура. Русија воопшто не го признава мачењето на цивили, а камоли нејзините причини за тоа. ОН, исто така, потврдија дека постојат докази дека цивилите биле користени како жив штит во близина на линиите на фронтот.
Новинарите на AP разговарале со дваесет поранешни затвореници, семејства на десетина цивили во притвор, двајца украински разузнавачи и еден владин преговарач од Киев. Нивните извештаи, како и сателитски снимки, социјални медиуми, владини документи и копии од писма обезбедени од Црвениот крст, го потврдуваат распространетиот руски систем на цивилно притворање и злоупотреба, директно кршење на Женевските конвенции.
Некои цивили биле задржани со денови или недели, а некои повеќе од една година. Речиси сите ослободени велат дека доживеале или биле сведоци на тортура, а повеќето опишале дека биле преместени од едно место на друго без објаснување.
Новата зграда во просториите на Затворската колонија бр. 2 има два ката и е одделена од главниот затвор со дебел ѕид, а се наоѓа во источниот руски регион Ростов. Според поранешните затвореници, семејствата на исчезнатите, активисти за човекови права и руски адвокати, таму веројатно се задржани стотици цивили од Украина.
