Холандскиот амбасадор, Коп во Скопје: Каде се милијардите што ги дадовме за реформи?
Холандскиот амбасадор во Северна Македонија, Дирк Јан Коп, во програмата „Дипломатија и бизнис“ рече дека оваа земја морала да спроведе реформи пред многу години, за што добиле милијарди евра, пренесува ИНА.
„Потребните реформи можеа да се направат пред 10-15 години, но не беа направени. Неподносливо е да се зборува за евроскептицизам од тој аспект, дури е и навредливо, бидејќи после 20-30 години поддршка за влез во ЕУ се поставува прашањето каде се милијардите, каде се и што стана со обуките што ги правевме? Зошто сите нови правила и прописи не се правилно имплементирани? Дали се работи за менталитет?“, рече Коп.
Тој потсети на помошта што земјата ја доби од ЕУ за време на пандемијата, но и на економската криза што настана поради високите цени на енергијата.
„Можеби се сеќавате, нашите даночни обврзници плаќаа за вакцините за коронавирус за Западен Балкан. Пред неколку месеци Европската комисија и даде на Владата на Македонија дополнителни 200 милиони евра, поради високите цени на енергенсите и инфлацијата, иако со истиот енергетски проблем и високите цени се соочија и нашите даночни обврзници“, рече Коп.
Тој вели дека смешни се критиките дека земјите-членки добиваат поголема финансиска помош за закрепнување од економската криза отколку земјите кандидати од Западен Балкан.
„Слушам кога се вели дека даваме повеќе пари на Бугарија, Романија, Грција, а не на земјите од Западен Балкан. Дозволете ми да одговорам на ова: Дали кога ќе им давате џепарлак на вашите деца или на децата на вашите соседи тоа ќе биде со иста сума? Смешно е“, рече амбасадорот Коп.
Според него, проблемот во Северна Македонија е што луѓето веќе немаат доверба во институциите и се жалат до судовите, обвинителството и полицијата.
„Вистинскиот проблем е што луѓето немаат доверба во институциите. Оваа доверба е десет пати помала во споредба со земјите од ЕУ. Луѓето се жалат во судови, во обвинителство, во полиција… Добиваме писма и мејлови. „Па, ние не сме слепи“, рече Коп.
За Холандија, кога станува збор за евроинтеграциите на Македонија, додаде Коп, првото нешто што секогаш ќе се мери е колку добро се спроведени реформите.
„Вашата цел треба да биде влез во ЕУ и тоа може да се случи за неколку години кога ќе ги исполните условите. А доколку дотогаш не го промените Уставот, тогаш секако дека ќе треба да го промените за да ги внесете сите промени во новата рамка на денот кога вашето знаме ќе биде подигнато покрај нашето во Брисел“, рече холандската амбасадорка.
