Храбри волонтерки на ниски температури трагаат по преживеани од земјотресот

Волонтерите работат во смени се додека постои надеж за преживеани во јужните делови на Туркијe

Елиф, волонтерка од Истанбул која е дел од екипите кои трагаат по преживеани по земјотресите што ја зафатија Туркије, не можеше да ги сокрие солзите радосници при извлекување на преживеаните.

„Можеби не сме во крвно сродство, но ние сме среќни и понекогаш плачеме кога успеваме да ги извлечеме преживеаните од под урнатините на оштетените згради“, рече триесетгодишната Елиф.

Околу 350 доброволци од Министерството за правда на Туркије се вклучени во операцијата за пребарување и спасување во провинциите Кахраманмараш, Хатај и Адијаман од понеделникот. Меѓу волонтерите има жени, а Елиф е водач на оние кои се распоредени во оваа провинција.

Волонтерите се вработени во министерството. Тие добиле четиринеделна обука за вонредни ситуации и се акредитирани во Претседателството за управување со катастрофи и вонредни состојби на Туркије (АФАД).

Групата низ трите провинции успешно спаси најмалку 39 лица од под урнатините на оштетените згради.

Волонтерите работат во смени. Акцијата за пребарување и спасување не запре откако тие беа распоредени набргу по земјотресите што ја погодија земјата во понеделникот.

„Имаме семејства и многумина од нас имаат деца, но оваа должност носи и солзи радосници и среќа кога ќе најдеме преживеани“, додаде Елиф.

Потрагата по преживеани продолжува

Близу до волонтерите од министерството се екипите за пребарување и спасување од Бурса, северозападна Туркије.

„Дојдовме во понеделникот вечерта и баравме преживеани“, рече еден работник од Бурса.

Тој вели дека одмораат четири-пет часа на ден и дека нивните тимови не прекинуваат со работа додека не се изгаснат светлата за пребарување.

Екипи за спасување од цела Туркије се собраа во Кахраманмараш и другите провинции погодени од земјотресот за да помогнат во операциите за пребарување и спасување. Возилата се наредени околу центарот на градот со волонтери, опрема за пребарување и помош за опустошената зона.

Огнови од дрво се палат низ поголемите делови од градот, каде што тишината е прекината од бучавата на кршачите на бетон.

Над 18.900 луѓе загинаа, а 74.200 се повредени во двојните земјотреси што ги погодија јужните делови на Туркије, според последните официјални податоци.

Вкупно 6.444 згради се урнаа поради земјотресите со јачина од 7,7 и 7,6 степени според Рихтер, кои се случија за помалку од 10 часа.

Туркије прогласи тримесечна вонредна состојба во 10 провинции погодени од земјотресите.

Земјотресите, со центар во провинцијата Кахраманмарас, погодија повеќе од 13 милиони луѓе во 10 провинции, вклучувајќи ги и Адана, Адијаман, Дијарбакир, Газиантеп, Хатај, Килис, Малатија, Османије и Шанлиурфа.

Неколку земји во регионот, вклучително и Сирија и Либан, исто така ги почувствуваа силните потреси што ја погодија Туркије.

Повеќе од 121.100 персонал за пребарување и спасување моментално работат на терен, според АФАД.

Вкупно 75.780 луѓе се евакуирани од регионите погодени од земјотресот, соопшти АФАД.

TRT Balkan