Ценкањето на Реџеп Таип Ердоган на крај вроди со плод: САД одобри продажба на 40 моќни авиони на Турција во вредност од 23 милијарди долари

Владата на Соединетите Американски Држави (САД) одобри продажба на 40 нови борбени авиони F-16 на Турција во вредност од 23 милијарди долари, откако официјална Анкара го ратификуваше приемот на Шведска во НАТО.

Договорот вклучува и комплети за модернизација на 79 постоечки турски авиони F-16, пренесува AP News.

Овој потег уследи само неколку часа откако Турција во петокот го депонираше својот инструмент за ратификација за прием на Шведска во НАТО со Вашингтон, дом на архивата на документи на Алијансата, и откако неколку клучни членови на Конгресот ги повлекоа своите приговори.

Турција долго време се обидува да ја надгради својата флота F-16 и ратификацијата на членството на Шведска во НАТО ја условуваше со одобрување на купувањето на авиони од страна на американската администрација.

Официјална Анкара го ратификуваше приемот на Шведска во НАТО по повеќе од една година одложување, што предизвика тензии во Алијансата.

Турскиот парламент ја ратификуваше кандидатурата на Шведска оваа недела, а претседателот Реџеп Таип Ердоган ја потпиша ратификацијата во петокот.

Претседателот на САД, Џо Бајден, потоа ја повика американската администрација да ја одобри продажбата на F-16 „без одлагање“.