Шпанија стана првата земја во Европа што го одобри „менструалното отсуство“

Парламентот на Шпанија во четвртокот го одобри законот за „менструално отсуство “ за жени со болно месечно крварење, првата земја во Европа што го стори тоа, објави Политико.

Законот беше донесен со 185 гласа „за“, 154 против и три воздржани.

Би-Би-Си забележува дека за користење на отсуството ќе биде потребна лекарска белешка. Законот им дава право на тридневно „менструално“ отсуство – со можност за продолжување на пет дена – за жените кои страдаат од тешки грчеви, гадење, вртоглавица, па дури и повраќање, пишува Euronews.

Гласањето е победа за социјалистичката влада на Педро Санчез, која успеа да ги надмине внатрепартиските поделби. Кармен Калво, социјалистичка пратеник, која беше потпретседател во претходниот кабинет на Санчез, гласаше „воздржано“.

Нацрт-законот беше поддржан од широка левичарска коалиција, вклучително и Социјалистичката партија, екстремно левичарскиот Подемос и две партии кои ја поддржуваат каталонската независност, додека конзервативната Народна партија и екстремната десница Вокс гласаа против мерката.

На законот се спротивстави и синдикатот УГТ, кој изрази загриженост дека работодавците повеќе би сакале да вработуваат мажи.

Мерката е дел од поширокото законодавство кое го олеснува пристапот до абортус во јавните болници. Малолетниците сега можат да се подложат на процедурата без дозвола на нивните родители на 16 и 17 години.

Во средните училишта ќе се делат бесплатни менструални и контрацептивни производи.

Шпанскиот Конгрес, исто така, конечно го усвои, по неколкумесечна понекогаш жестока дебата, закон со кој се дозволува бесплатна промена на полот на личните документи од 16-годишна возраст.