Ја спроведоа ветената одмазда: Воздушни напади во Ирак и Сирија по смртта на 12 турски војници

Целите беа објекти за кои се верува дека ги користеле милитантите

Турските воздухопловни сили извршија воздушни напади во северен Ирак и Сирија и уништија 29 цели на забранетата Курдистанска работничка партија (ПКК), откако 12 војници беа убиени во северен Ирак во последните два дена , соопшти синоќа турското Министерство за одбрана.

Операциите на турските воздухопловни сили во северен Ирак и Сирија беа насочени кон бази, засолништа и нафтени објекти за кои се верува дека ги користат милитантите на Курдистанската работничка партија.

Претходно во саботата, турското Министерство за одбрана објави дека војската извршила воздушни напади врз цели на ПКК и „неутрализирала“ најмалку 16 милитанти на ПКК во тековните судири.

Воздушните напади на Турција уследија по најавата на турското министерство дека најмалку 12 војници биле убиени во изминатите два дена во напад на членови на Работничката партија на Курдистан врз база во близина на Хакурк, во северен Ирак.