5 проблеми со забите кои не смеете да ги игнорирате: Можат да укажуваат на сериозни болести

Кога станува збор за основите на денталната хигиена, повеќето луѓе знаат да ги следат клучните правила како четкање два пати на ден и чистење со конец. Сепак, многумина брзо ги отфрлаат навидум малите проблеми со забите што се појавуваат, а тоа може да биде опасно. Ова се симптомите на кои треба да обрнете внимание.

Стоматолозите не ги третираат само забите. Вашата уста е отвор за целото ваше тело и сè е поврзано, така што прескокнувањето на прегледите или игнорирањето на болката во забите може да доведе до поголеми проблеми по патот, предупредува д-р Акеадра Бел, стоматолог и клинички доцент на Стоматолошкиот факултет на Универзитетот во Источна Каролина.

Ако се прашувате кои проблеми треба да ве доведат до стоматолошката фотелја, еве што имаат да кажат експертите за тоа.

Крварење при четкање или чистење со конец

Крварењето при четкање или чистење со конец може да биде ран знак за пародонтална болест. Во раните фази, проблемот може да влијае на ткивото на непцата, но може да продолжи да предизвикува оштетување на коските доколку не се лекува, вели д-р Крег Ноблет, клинички вонреден професор и директор на одделот за ендодонција на Стоматолошкиот факултет на Универзитетот во Минесота.

Сепак, не секое крварење е знак на пародонтална болест.

– Може да имате локализирана иритација на ткивото на непцата доколку нешто се заглави во непцата до забите – вели Ноблет и додава – Лушпите од пуканки се вообичаени виновници за овој вид на иритација. Но, ако често забележувате крварење додека четкате или користите забен конец, тоа е сигурен знак дека имате проблем што треба да го реши вашиот стоматолог.

Секаква болка во устата

Важно е да пријавите каква било болка кај вашиот стоматолог, без разлика дали се појавува во забите или непцата, дали се појавува кога џвакате, четкате забите или не правите ништо.

Болката може да укажува на процес во коренот на забот, инфекција, но и иритација предизвикана од прекумерно четкање на забите и слично.

Чувствителност на температура

Ако вашите заби се чувствителни на топло или студено, особено на ниска температура, треба да обрнете внимание.

Обрнете особено внимание на болката што продолжува дури и по голтање храна или појава на пулсирање, бидејќи тоа може да биде показател дека ткивото на пулпата во еден или повеќе заби е воспалено или дека има кариес.

Отокот

Оток или апсцес може да се појави на непцата, јазикот, образот или било каде во устата и бара итна стоматолошка помош. Дополнително, раните кои не зараснуваат се уште едно црвено знаме. Исто така, ова може да укажува на блокиран плунковен канал или само иритација, но дефинитивно е неопходно стоматологот да направи преглед.

Крцкање на забите

Крцкањето или стегањето на забите во текот на ноќта можеби не е толку лесно да се препознае како некои од другите проблеми споменати погоре. Сепак, оваа навика може да доведе до пукање на забите и промени во начинот на кој горните и долните заби се вклопуваат заедно.

Ако спиете покрај вашиот партнер, тој можеби ќе може да каже дали ви крцкале забите навечер. Може и самите да забележите некои знаци, како што е главоболка.

Бидејќи секој човек различно ги доживува работите, важно е да пријавите каква било нова непријатност или загриженост кај вашиот стоматолог за да може да погледне што се случува.